Анатолий Васильевич остуол тенниһинэн оскуолаҕа үөрэнэ сылдьан кыратык дьарыктанара, онтон армияттан кэлэн баран совхозка үлэлии сылдьан кулуупка үлэлэрин быыһыгар уонна өрөбүллэригэр күнү-күннүктээн оонньуур буолаллара.

Анатолий 2016 сыллаахха ветераннарга улуус күрэхтэһиитигэр остуол тенниһигэр 3 миэстэ буолбута, 2015 с. Бүлүү куоракка инбэлииттэр зональнай күрэхтэһиилэригэр 3 призер буолан үөрэн, астынан турардаах.

Буулдьанан ытыынан эмиэ хойут дьарыктаммыта. 2015 с. улууска дэриэбинэлэр икки ардыларынааҕы Спартакиадаларыгар чемпион үрдүк аатын ылбыта, 2016 с. ветераннар зональнай күрэхтэһиилэригэр эмиэ чемпионнаабыта, 2016 с. Сочи куоракка ыытыллыбыт доруобуйаларынан хааччахтаах дьон аан дойдутааҕы Фестивалларыгар остуол тенниһигэр уонна дартс күрэҕэр 2 миэстэлэри ылан үрдүк ситиһиилэрдэммитэ.

Соторутааҕыта муус устар 14-15 күннэригэр Далырга өрүс анараа өттүнээҕи оскуолалар Спартакиадаларыгар буулдьанан ытыыга 45 саастарыттан үөһээ саастаахтарга бастаабыта.