Татьяна Дмитриевна 1962 с. бэс ыйын 4 к. Тамалакаан нэһилиэгэр төрөөбүтэ. Аҕыс кылаас кэннэ медучилищеҕа киирэн үөрэнэн 1981 с. бүтэрэн фельдшер идэлэнэн Нам участковай балыыһатыгар үлэтин саҕалаабыта. Нам балыыһатыгар 20 сыл фельдшеринэн, медсестранан, кэлин куоракка 10 сыл детсадка медсестранан үлэлээбитэ. Үлэлии сылдьан ыалдьан инвалид буолбута уонна кэлин аматыйан Нам нэһилиэгин инвалидтарын обществоларыгар кыттыһан, “Санаа күүһэ” диэн ааттаах түмсүү тэринэн араас мероприятиеларга, күрэхтэһиилэргэ кытталлар.

Татьяна Дмитриевна кыра эрдэҕиттэн хабылыкка, хаамыскаҕа сөбүлээн оонньуура, онон бу кэнники олоҕор араас зональнай, республиканскай күрэхтэргэ кыттан миэстэлэһэр. 2013 с. Дьокуускай куоракка инвалидтар республикатааҕы IV Спартакиадаларыгар 1 миэстэ, 2015 с. Бүлүү зонатын I норуоттар икки ардыларынааҕы   культурнай-оздоровительнай фестивалыгар 1 миэстэ, Дьокуускай куоракка доруобуйаларынан хааччахтаах дьон республикатааҕы чемпионатыгар 1 миэстэ, 2015, 2016 сс. Үөһээ Бүлүү улууһун инвалидтарын Спартакиадатыгар 1 миэстэ, 2016 с. Чурапчыга остуол оонньууларын Федерациятын Кубогар 1 миэстэ, 2017 с. ХХ Манчаары Спартакиадатыгар кыттар путевка ылбыта.

Татьяна Дмитриевна кэргэнэ Герман Спиридоновичтыын үс оҕолоох, икки сиэннээх дьоһун-мааны, нэһилиэккэ убаастанар-ытыктанар ыаллар.