Александра Исаевна 1965 сыллаахха Горнай улууһун Маҕарас нэһилиэгэр күн сирин көрбүтэ. Оҕо сааһа төрөөбүт нэһилиэгэр ааспыта. Орто оскуоланы Аһымаҕа үөрэнэн бүтэрбитэ. Оскуола - производство – үрдүк үөрэх девиһинэн дойдутугар Бэс күөлгэ үс сыл ыанньыксытынан үлэлээбитэ. Онтон СПТУ-га киномеханик идэтигэр үөрэммитэ, 2005 сыллаахха олоҕун аргыһын көрсөн Үөһээ Бүлүү улууһугар Тамалакаан нэһилиэгэр кийиит буолан кэлбитэ, түөрт оҕо күн күбэй ийэтэ. Маҥнай ыһыахтарга, үлэлиир тэрилтэтин, олорор нэһилиэгин чиэһин көмүскээн тэрилтэлэр, нэһилиэктэр икки ардыларыгар буолар күрэхтэһиилэргэ кыралаан кыттар этэ. Онтон сиэттэрэн бэйэтин кыаҕынан күрэхтэһиилэргэ элбэхтик кыттар буолбута. Ордук саха национальнай оонньуутунан, мас тардыһыытынан сөбүлээн дьарыктанар.

Александра Исаевна спортка маннык ситиһиилэрдээх:

2007 с. Д. Никаноров кэриэһигэр ыытыллыбыт республикатааҕы турнирга III м, мас тардыһыытыгар Ньурба Чаппандатыгар ыытыллыбыт турнирга бастакы миэстэни ылаттаабыта.

2008 с. И. Николаев республикатааҕы турнирын кыайбыта. 2009 с. Е. Евсеев республикатааҕы турнирыгар II м тахсыбыта, Ньурба куоратыгар ыытыллыбыт республика чемпионатыгар III м, Владимир куоракка ыытыллыбыт Россия чемпионатыгар  II м ылаттаабыта.

2011 с. Тааттаҕа, 2012 с. Хаандыгаҕа республика чемпионаттарыгар III м буолбута, Үөһээ Бүлүү Ороһутугар А. Кузнецов бирииһигэр республика турнирыгар III м тахсыбыта.

2014, 2016 сс. инвалидтар IV, V Спартакиадаларыгар чемпион үрдүк аатын ылбыта.