Дьулус Антонов  1991 с. Үөһээ Бүлүү улууһун Ороһу нэһилиэгэр төрөөбүтэ. Дьулус 2008 с. Дьокуускайдааҕы национальнай гимназияны ситиһиилээхтик үөрэнэн бүтэрэн баран Россия Армиятыгар сулууспалаан кэлэн баран Хабаровскайдааҕы экономика уонна быраап государственнай Академиятын үөрэнэн бүтэрэр. Дьулус Анатольевич билигин Саха Республикатын Правительствотын Хабаровскай куораттааҕы бэрэстэбиитэлистибэтигэр ситиһиилээхтик үлэлиир.

         Дьулус 2013 с. альпинизмынан утумнаахтык дьарыктанар, “Россия альпиниһа” диэн ааты быйыл ылла. Кини бу үс сыл устата альпинизмынан дьарыктанан Россия уонна Европа саамай үрдүк хайатыгар Эльбруска 2016 с. сааһыгар ыттыбыта, ити сыл аатырбыт Казбек очуоһугар тахсыбыта, 2015 с. сайыныгар Хабаровскай кыраай Дуссе-Алинь хайатыгар, Крым хайаларыгар тахсыталаабыта, Илиҥҥи Саян хайаларыгар үөрэнэр-эрчиллэр базаҕа дьарыктаммыта.

         Дьулус Анатольевич ыттыбыт хайаларын чыпчаалларын сатаан этиллибэт кэрэлэригэр ылларан альпинизмынан кыанан сылдьарын тухары дьарыктанар санаалаах, альпинизм киһиэхэ эр санааны иитэр, хорсун-хоодуот уонна бэйэни кыанар буоларга уһуйар, иитэр диэн кини ааҕар.

         Бу сахалартан сэдэх көрүҥүнэн ылсыһан туран дьарыктанар, аан-дойду аатырбыт хайаларын чыпчаалларыгар ыттар туһугар эрчиллэ, дьарыктана сылдьар уолбутугар ситиһиилэри баҕарыаҕыҥ.