Егоров Иван Сергеевич 1987 с. Дүллүкү нэһилиэгэр Сергей Иванович Егоров дьиэ кэргэнигэр бастакы оҕонон төрөөбүтэ. Оскуола сылларыттан аҕатын туйаҕын хатараары мас тардыһыытынан баҕаран туран дьарыктанан улааппыта. Спорт бу ыарахан көрүҥүнэн анаан-минээн дьарыктанан нэһилиэк, улуус, зона иһигэр муҥутуур элбэхтик чемпион уонна призер буолуталаабыта.

         2016 с. мас тардыһыытыгар чугас өссө ханнык көрүҥнэр баалларый диэн сүүмэрдээн бэйэтин армлифтинг диэн саҥа көрүҥҥэ холонон көрөргө санаммыта. Ол сыл күһүнүгэр Дьокуускайга “Туймаада боотурдара” диэн региональнай күрэхтэһиигэ бастакы төгүлүн кытта бараат, Аполлон Аксель диэн дисциплинаҕа бэйэтин кыттар ыйааһыныгар рекорднай киилэни ылан бастаабыта. Ол кэннэ быйыл саас олунньу ыйга “Зимний фестиваль силовых видов спорта” диэн улахан күрэхтэһиигэ баран Аполлон Аксель уонна Роллинг Тандер диэн дисциплиналарга бастаабыта.

         Онтон бэйэтигэр бигэтик эрэнэн, спонсор көрдөнөн эмиэ сылын ахсын ыытыллар Бүтүн Россиятааҕы спорт күүһү эрэйэр көрүҥнэригэр спортивнай фестивальга барарга санаммыта. Онно эмиэ Аполлон Аксель тардыытыгар 2,5 эрэ киилэнэн бастаабыт спортсмеҥҥа баһыйтаран, икки сылы быһа бастыы сылдьыбыт чемпионы 3 миэстэҕэ үтэйэн бочуоттаах 2 м буолар чиэскэ тиксибитэ. Бу күрэхтэһиигэ Россия спордун маастарын нуорматын толорон көрөөччүлэрин уонна ыалдьааччыларын үөртэ.

         Иван Сергеевич анал тренерэ суох, бэйэтин систематынан дьарыктанар, эрчиллэр снарядтарын маннык буолуохтаах диэн уус уонна сварщик уолаттарын көмөлөрүнэн бэйэтэ айан, чочуйан оҥостор. Онтон сыаналаах оригинальнай снарядтары ыларыгар тэрилтэтин салайааччыта Еттянов Н.Н. өйөөн, үбүнэн көмөлөһөн булунна. Иван Сергеевич үлэтин миэстэтигэр кыһыннары үлэлиир ичигэс ыскылаат иһигэр муннукка, сайын тиэргэнигэр сарай оҥотторон уолаттарын дьарыкка угуйар, көмөлөһөр.

         Иван Сергеевич уонна кини бииргэ дьарыктанар уолаттара күрэхтэһэ барар-кэлэр ороскуоттарын тэрилтэлэрин салайааччыта Еттянов Н.Н. оҥорор көмөтүгэр махталлара улахан.