1957 сыл сэтинньи 19 күнүгэр Боотулууга төрөөбүтэ. 1965-75 сылларга Боотулуу орто оскуолатыгар үөрэммитэ. Үөрэҕэр үчүгэй этэ, ордук математика, физика предметтэрин сөбүлүүрэ. Спорт көрүҥнэриттэн волейболу уонна баскетболу ордороро. Онус кылааһы бүтэрээт Магаданнааҕы педагогическай институт физико-математическай факультетыгар үөрэнэ киирбитэ. Икки сыл устата баскетболга уонна волейболга сылдьыбыта, онтон үһүс кууруска үөрэнэ сылдьан, күһүн, буоксанан дьарыктаныан баҕаран буоксаҕа көспүтэ. Онно Мирнэйтэн сылдьар, буоксаҕа норуоттар икки ардыларынааҕы кылаастаах маастар, физмат бэһис кууруһугар үөрэнэр Лева Фролов тренердэрин кытары кэпсэтэн көмөлөспүтэ.

Онтон ыла Василий утумнаахтык боксанан дьарыктанан барбыта. Үс ый буолан баран бастакы эрэсэрээти толорбута, Магадан уобалаһыгар бастаабыта. Сылы кыайбат курдугунан маастарга кандидат нуорматын толорбута уонна үөрэҕин бүтэриэр диэри 54 кг бастакы миэстэни кимиэхэ да биэрбэтэҕэ.

1980 сыллаахха үөрэҕин ситиһиилээхтик бүтэрбитэ. Мэҥэ-Хаҥалас оройуонугар Төхтүр орто оскуолатыгар үлэтин саҕалаабыта. Кэллэҕин сыл күһүнүгэр 54 кг Саха сирин бастыҥ боксердарын барыларын нокаутунан кыайталаан кыахтаахтык бастаабыта уонна ол кэнниттэн түөрт сыл устата иннин кимиэхэ да биэрбэтэҕэ. Советскай Союз, Россия элбэх араас таһымнаах күрэхтэһиилэригэр ситиһиилээхгик кыттыбыта. Ол курдук Россияҕа иккис  миэстэлэнэн ССРС спордун маастара буолбута. Россия тыатын сирин спортсменнарын ортотугар бастаабыта, ССРС тыатын сирин спортсменнарын ортотугар икки төгүл бастаабыта уонна Ленинградка, Москваҕа, Барнаулга, Кишиневка уо.д.а. куораттарга буолбут Бүтүн Союзтааҕы күрэхтэһиилэргэ бастаабыта, миэстэлэспитэ. Россия 1982 сыллааҕы чемпиона.

Төхтүр орто оскуолатыгар икки сыл үлэлээн баран, Майатааҕы оҕо спортивнай оскуолатын старшай тренерэ, директора буолбута. Онтон 1992 сыллаахха Майаҕа саҥа тэриллибит гимназия директорын солбуйааччытынан ананан үлэлээн испитэ. Ол үлэтинэн Дьокуускайга командировкаҕа кэлэ сылдьан, 1993 сыл алтынньытыгар биһиги кэккэбититтэн хомолтолоохтук туораабыта.