Улуус биир бастакы боксера Михаил Донской

Далырга эдэр ыччат спордунан маассабайдык дьарыктаныыта А.И. Донской физкультура учууталынан ананан 1957 сыл күһүнүгэр кэлиэҕиттэн саҕаламмыта. Оскуолаҕа волейбол, баскетбол, чэпчэки атлетика, тустуу, кэнники остуол тенниһин секциялара үлэлиир буолбуттара. Эргэ оскуолаҕа биир кылаас хоһо физкультура уруогун ыытарга анаммыта. Миша Донской ити сылларга фермаҕа олорор буолан ити секцияларга сылдьар кыаҕа суох этэ. Ол эрээри 7-с кылааска үөрэнэ сылдьан хапсаҕайга аҕыс кылаастаах оскуолалар күрэхтэһиилэригэр оройуоҥҥа тустубуттаах. Ити кэмҥэ тустуу секциятын Петр Яковлев (Бэчээт) уонна ахсыс кылаас үөрэнээччитэ Александр Архипов ыыталлар эбит. Үөһээ Бүлүүгэ киирэн И. Барахов оскуолатын оччотооҕу дьиэтин иһигэр баар дьоҕус залга тустубуттар. Онно аҕыс кылаастаах оскуолалар икки ардыларыгар күрэхтэһиигэ Михаил иккис миэстэ буолан үөрбүтэ-көппүтэ. Ити Михаил спортка бастакы боччумнаах ситиһиитэ этэ.

Михаил Донской 1964 сыллаахха Омскайга тыа хаһаайыстыбатын институтугар үөрэнэ киирбитэ. Институтка көҥүл тустуу секцията суох буолан бокса секциятыгар суруттарбыта. Бу спорду сөбүлээн кыһаллан дьарыктанан барбыта. Тренердэрэ – Геннадий Рудаков диэн Уһук Илин уонна Сибиир чемпиона, спорт маастара – киһи да, специалист да быһыытынан астык, дириҥ билиилээх үчүгэй тренер эбитэ үһү. Ахсынньыга институтун үгэскэ кубулуйбут чемпионатыгар кыттан Михаил 60 кг ыйааһыҥҥа эрэллээхтик кыайбыта. Бастакы кыттыыта буолан, ким да билбэт киһитэ кыайан соһуталаабыт, гидромелиоративнай факультет студеннарыгар герой курдук буолбут. Михаил үөрэнэр кэмигэр институтугар биэс сыл субуруччу чемпионнаабыта, кимиэхэ да хотторботоҕо.

1967 сыллаахха «Буревестник» спортивнай общество уобаластааҕы Советын күрэхтэһиитигэр кыттыбыта. Ити кэмҥэ «Буревестник» обществоҕа Омскай уобалас аҕыс үрдүк үөрэҕин тэрилтэлэрэ киирэллэр этэ. Ордук Омскайдааҕы физкультура уонна спорт институтун студеннара аатыраллара. Кинилэр ортолоругар ССРС, Аан дойду, Олимпиада кыайыылаахтара бааллара. Бу күрэхтэһиигэ Михаил физкультурнай институт маастарын нокауттаан чаҕылхайдык чемпионнаабыта. Ити ситиһиитинэн 1-кы разрядыгар маҥнайгы кандидатскай баалын эбиммитэ. Институтун бастыҥ спортсменнарын ахсааныгар киирэн “Бочуот дуоскатыгар” тахсыбыта. Михаил күрэхтэһэр сылларыгар студент боксердар ортолоругар араас омуктар бааллара. Ол курдук биэс сылы быһа күрэхтэһиилэргэ буоксаласпыт уолаттарын ортолоругар 3 кореец, 3 казах, 2 татаар, 1 башкир бааллара, уоннааҕылара украинец уонна нуучча уолаттара этилэр. Ити сылларга омугунан арахсыыны, атааннаһыыны, туората сатааһыны биирдэ даҕаны көрсүбэтэҕэ, бары эриэ дэхси үчүгэй табаарыстыы сыһыаннаах эбиттэр.

Михаил Гаврильевич спордунан дьарыктаммыта олоҕор, үлэтигэр-хамнаһыгар элбэхтик туһалаатаҕа, ол курдук бэйэҕэ эрэллээх буолуу уонна ыарахаттары кыайарга дьаныардаах, тулуурдаах буолуу, бириэмэни сыаналааһын, сатаан туһаныы наадатын ордук спордунан  дьарыктанар кэмигэр билбитэ уонна олоҕор куруук туһанар. Михаил спорт уонна  физкультура хас биирдии киһиэхэ олоҕун эйгэтинэн буолуохтаах диэн эдэр дьоҥҥо сүбэлиир.