Гоша 1994 сыл балаҕан ыйын 25 күнүгэр Үөһээ Бүлүү сэлиэнньэтигэр Муся, Егор Евсеевтэр дьиэ кэргэттэригэр иккис оҕонон күн сирин көрбүтэ. Аҕата Егор Васильевич оҕо сылдьан көҥүл тустууга 48, 52 кг диэри ыйааһыннарга Бүлүү зонатын, республика биир бастыҥ бөҕөһө этэ. Улахан дьоҥҥо үс төгүл Россияҕа миэстэлэһэн маастарга кандидат буолбута. Советскай Армияҕа сулууспалыы сылдьан оһоллонон тустууттан арахсыбыта. Ийэтэ Муся оскуолаҕа үөрэнэр бириэмэтигэр оройуоҥҥа оҕолор спартакиадаларыгар волейболга, баскетболга, хайыһарга кыттааччы, оскуолатын хамаандатын кытары хаста да бастаабыта. Гоша эһэлэрэ да спорт диэн баран муннукка ытаабыт дьон буоллаҕа. Василий Егорович Евсеев Хабаровскайга үөрэнэ сылдьан буоксаҕа куоракка бастаан, зонаҕа миэстэлэһэн турардаах. Биир эһэтэ Егор Егорович Васильев отучча сыл физкультура учууталынан үтүө суобастаахтык үлэлээбитэ, дэгиттэр спортсмен, спорду көҕүлээччи-тэрийээччи быһыытынан биллэр.

         Гоша 4-5 сааһыгар дьиэлэригэр 4 убайынаан сүүрүү-көтүү бөҕө буолаллара. Ону боччумурда түһээри туһуннаран, мас тардыһыннаран аралдьыталлара. Убайдара тустууга сабырыйаллара. Эһэлэрэ бэрчээкки булан биэрэн боксалаһыннарар буолбута. Күнү быһа биликтэһэн бэрчээкки илийиэр дылы киирсэллэрэ.

         Гоша сэттис кылааска үөрэнэригэр туста сылдьар дьарамай уолу Дмитрий Павлович Руфов бэлиэтии көрөн буокса секциятыгар ылан эрчийэн барбыта. Ситиһиилэр оскуола иһиттэн саҕалаан көстөн барбыттара.

         Онус, уон биирис кылаастарга үөрэнэр бириэмэтигэр үөрэнээччилэр республикатааҕы спартакиадаларыгар буоксаҕа иккитэ бастаабыта.

2010 сыллаахха олимпийскай эрэл училищетыгар (УОР) үөрэнэ киирбитэ. Юниордарга республикаҕа бастаабыта. Ити сыл Хабаровскай куоракка иккис миэстэ буолары ситиспитэ.

         2013 сыллаахха Чита куоракка “А” кылаастаах Иосиф Кобзон бирииһигэр буоксаҕа Россия турнирыгар бастакы миэстэ буолан РФ спордун маастарыгар кандидат буолбута.

         2014 сыллаахха Нерюнгри куоракка “А” кылаастаах Сергей Исмаилов аатынан Россия турнирыгар бастаабыта. Онтон сотору республика улахан дьонугар чемпионнаабыта. Ити сыл Магадаҥҥа иккис миэстэҕэ алта киһиттэн тиксибитэ. Хабаровскайга 49 киилэҕэ сыыһа тактиканы туттан хотторуу хомолтотун билбитэ. Ити сыл Намҥа Саха сирин норуоттарын спартакиадатыгар үһүс бириистээх миэстэҕэ тахсыбыта. Владивосток куоракка Уһук Илин спартакиадатыгар 49 кг эрэллээхтик бастаабыта. Онтон сотору Казань куоракка Россия эдэрдэригэр үһүс миэстэ буолбута. “Ити күрэхтэһиигэ эдэр маастардар элбэхтэрэ,” – диэн кэпсиир. Күһүөрү кыһын Саха сиригэр бастыыр иһин күрэхтэһиигэ бэйэтин 52 кг боруобаланан бастаабыта.

         2015 сыллаахха “Тула гран-прита” (“Гран-при Тулы”) диэн Бүтүн Россиятааҕы “А” кылаастаах турнирга бастакы миэстэни ылбыта.

         2016 сыл ыам ыйын 16-22 күннэригэр Тульскай уобалас Алексин куоратыгар ыытыллыбыт “Локомотив” РФСО буоксаҕа чемпионатыгар эр дьоҥҥо 49 кг бастаабыта, бэс ыйын 7-11 күннэригэр “Севастополь геройдарын кэриэһигэр” Бүтүн Россиятааҕы “А” кылаастаах маастар нуормалаах турнирга эр дьоҥҥо 52 кг бастаан РФ спордун маастара буолар баҕатын толорбута. Үөһээ Бүлүү ыһыаҕыгар Егор Евсеевы улуус баһылыга, спорт үлэһиттэрэ өрөгөйдөөн туран эҕэрдэлээбиттэрэ, СКС карабиҥҥа тиийэ наҕараада туттарбыттара.

         Бу соторутааҕыта Россия чемпионатыгар 25 киһи кыттыылаах 52 кг диэри ыйааһыҥҥа Икрамов диэн Россия биир тарбахха баттанар чулуу боксеругар тэҥ киирсиигэ очконан хотторон күрэхтэһиитэн туораабыта.

         Егор Евсеевы инники элбэх эрчиллиилэр, сбордар күүтэллэр.