Алексей Николаевич Үөһээ Бүлүү улууһун Хоро нэһилиэгэр 1978 с. балаҕан ыйын 23 к. Марина Алексеевна, Николай Иннокентьевич Захаровтар дьиэ кэргэттэригэр иккис оҕонон күн сирин көрбүтэ. Кыра сааһыттан олоххо боччумнаах көрүүлээх, аҕыйах саҥалаах, туруоруммут былаанын ситэрэр, эппитин толорор буола улааппыта. Оскуолаҕа үөрэнэр сылларыгар дьаныардаахтык спордунан дьарыктанар этэ. Ол кэмҥэ сайдан эрэр спорт көрүҥүн боксаны олус сэҥээрбитэ, дьарыктанар баҕаттан турник, боксерскай груша оҥостон дьарыктанар этэ.

1995 с. Хоро орто оскуолатын  бүтэрээт ЯПУ физкультурнай отделениетыгар үөрэнэ киирбитэ. Ол курдук физкультура учуутала, боксаҕа тренер идэтин баһылаабыта.

1998 с. Советскай Армия кэккэтигэр военно-воздушнай десантнай войскаҕа сулууспалаабыта. Салгыы үөрэҕин үрдэтинэн СГУ физкультурнай институтун бүтэрбитэ.

2001 c. олоҕун аргыһын көрсөн ыал буолбута. Кэбээйи улууһугар Тыайа орто оскуолатыгар бокса тренеринэн айымньылаахтык үлэтин саҕалаабыта. Тыайаҕа үлэлиир сылларыгар үс төгүл «Бастыҥ тренер» аатын ылбыта. Манна кини улуус, республика, Уһук Илин зонатын чемпионнарын иитэн таһаартаабыта. Ол курдук, Баишев Саша,  Гуляев Егор, Полятинскай Максим, Полятинскай Кеша, Кузнецов Сергей, Ефимов Ваня, Ефимов Кеша уо.д.а. Кини иитээччилэрэ: «Тренербит Алексей Николаевич спортка эрэ көҕүлүүр буолбатах этэ, биһигини киһи быһыытынан сайдарбытыгар, олоххо тус суол буларбытыгар үгүс үтүөлээх тренер этэ» — диэн ахталлар.

2010 c. төрөөбүт дойдутугар Хороҕо көһөн кэлбитэ. Үөһээ Бүлүүтээҕи оҕо спортивнай оскуолатыгар үлэтин саҕалаабыта. Алексей Николаевич Үөһээ Бүлүүгэ боксаҕа биир бастыҥ тренер этэ. Кини туһунан суоллаах-иистээх, атын буочардаах тренер быһыытынан биллэрэ. Оҕолорго сыһыана, ирдэбилэ туруорбут сыалын тиһэҕэр тиэрдэ сатыыра. Ол да курдук эрчийэр оҕолоро ураты бэрээдэктээх буолаллара. Алексей Николаевич боксаҕа республика уонна Уһук Илин региоҥҥа ыытыллар күрэхтэргэ чемпионнары иитэн таһаарбыта.

Сайын аайы «Хоһуун» оҕо спортивнай лааҕырыгар начальнигынан үлэлиир этэ. Холку майгылаах, киэҥ көҕүстээх, истиҥ сыһыаннаах, үлэтигэр ураты ньымалары көрдүүр бэрэниилээх үлэһит буолан оҕолор бу лааҕырга үөрүүнэн бараллара.  Манна кини иитэр оҕолорун тулуурдаах, дьулуурдаах-дьаныардаах буоларга үөрэппитэ. Бэйэтин үлэтигэр сүрдээх бэриниилээх, дьиҥнээх фанат, олус чиэһинэй, олоххо тус ирдэбиллээх, эрэллээх доҕор этэ. 2014 с. үүнэр көлүөнэни иитиигэ киллэрбит кылаатын иһин Саха Республикатын үөрэҕириитин туйгуна аат иҥэриллибитэ.      

Алексей Николаевич  лидер хаачыстыбалаах, ылыннарыылаах саҥалаах, салайар талаанын таба көрөн,  2015 с. олунньу ыйыгар Хоро орто оскуолатын директорынан анаабыттара. Кини директорынан үлэлээбит бэрт кылгас кэм иһигэр саҥа сүүрээннэри киллэрэргэ дьулуспута, агрооскуола статуһун үрдэтэр туһугар сыратын анаан испитэ. Кини билиҥҥи кэмҥэ уол оҕону патриот тыыннаах иитэргэ сыал-сорук туруоран, араас хайысханы туруоран үлэлиир былааннааҕа. 

Алексей Николаевич кэрэгэнэ Виктория Александровна Захарова үрдүк категориялаах  Хоро орто оскуолатын алын сүһүөҕүн учуутала, уола Коля 9-с кылаас үөрэнээччитэ, минньигэс кыыстара Яночкалара 3 саастах, детсад иитиллээччитэ. Алексей уолун элбэххэ үөрэппитэ-ииппитэ, батыһыннара сылдьан үлэлэтэрэ, айылҕаҕа тэҥҥэ сылдьан холобурдаан көрдөрөрө. Уолун Коляны 3 сааһыттан боксаҕа эрчийэн барбыта. Коля боксаҕа улуус, республика хас да төгүллээх чемпиона. Дьиэ кэргэнигэр бөҕө тирэх, амарах аҕа, урууларыгар-аймахтарыгар болҕомтолоох киһи этэ.

Алексей иллэҥ кэмигэр быыс буллар эрэ кинигэ ааҕара. Кини наһаа үчүгэйдик ыллыыр этэ. Эр киһи сиэринэн бултуурун-алтыырын, айылҕалыын алтыһарын сөбүлүүрэ. Тыаҕа таҕыстаҕына илии тутуурдаах, өттүк харалаах астынан кэлэрэ. Күндү киһибит күөгэйэр күнүгэр сылдьан ыалдьан олохтон туораабыта.