Киэҥ Россия буоксаҕа икки төгүллээх чемпиона

         Александр Григорьевич Петров 1959 сыллаахха сэтинньи 27 күнүгэр Үөһээ Бүлүү Өргүөтүгэр төрөөбүтэ. Александр Григорьевич Өргүөт нэһилиэгин төрүт олохтооҕо. Кини аймахтара үөрэҕи-үлэни өрө туппут дьон. Төрүттэриттэн Трофим Иустинович Петров төрөөбүт дойдутугар оскуола туттарбыт сүҥкэн үтүөлээх. Сыдьааннара үөрэхтээх дьон буолбуттар. Петровтартан Тамара Ивановна педагогическай наука кандидата буолбута, оттон Антонина Ивановна Петрова уонна биир чугас аймахтара Михаил Спиридонович Воронкин наука доктордара буолбуттара. Бырааттара Александр Григорьевич Петров – педагогическай наука кандидата.

Тойоку оскуолата Трофим Иустинович Петров аатын сүгэр. Оскуола улууска биир бастыҥ үлэлээҕинэн биллэр, үөрэх-иитии боппуруоһугар үчүгэй өрүттээх үлэ тэриллэр. Оскуола саҥа куорпуһа оҕо эрэ үөрэниэх, үлэһит эрэ баҕаран туран үлэлиэх курдук сырдык-ыраас көстүүлээх. Оскуола оформлениета олус тупсаҕай, оскуоланы төрүттээбит уонна манна үөрэммит биллиилээх, үөрэхтээх, үлэһит дьон киэҥник сырдатыллыбыттар.

         Александр Петров боксер буолуох быатыгар эбитэ дуу, оҕо эрдэҕинэ бииргэ төрөөбүт эдьиийэ Фекла Ньурбаҕа ыал буолан олохсуйбута. Саша эдьиийигэр тиийэн олорбута уонна бастаан икки сыл тустууга эрчиллибитэ. Онтон бииргэ үөрэнэр оҕолор тутуспутунан П. Быдыгнов буокса оскуолатыгар киирбиттэрэ. Бу уолаттартан элбэх биллиилээх боксер иитиллэн тахсыбыта.

Ол эрэн А. Петров ситиһиитэ барыларыттан таһыччы үрдүк. Ол курдук Саха сирин элбэх төгүллээх чемпиона, Сибиир уонна Дальнай Восток норуоттарын спартакиадатын чемпиона, Россия 2 төгүллээх чемпиона, Россия 1981 сыллааҕы үрүҥ көмүс призера, Россия “Спартак” обществотын, дойду “Спартак” обществотын чемпиона. Рига куоракка, Улан-Удэҕэ норуоттар икки ардыларынааҕы турнирдар чемпионнара, Махачкала куоракка “А” категориялаах буокса турнирын иккис миэстэлээҕэ, ССРС чемпионатын кыттыылааҕа.

Рингаҕа тахсарын тохтотон баран буокса тренеринэн үлэлээн барбыта. 1986 сыллаахха спортка тус бэйэтин уонна тренер быһыытынан ситиһиилэрэ бэлиэтэнэн “Саха АССР физическай культуратын, спордун сайдыытыгар үтүөлэрин иһин” знагынан наҕараадаламмыта. Үрдүк категориялаах тренер Петров эрчийбит уолаттарыттан элбэх РФ спордун маастардара тахсыбыттара. Дойду сүүмэрдэммит хамаандатын састаабыгар киирэн Россия чиэһин көмүскээбиттэр истэригэр Дмитрий Винокуров, Николай Дмитриев, Артем Максимов, Расул Магомедов, Семен Степанов, Дарман Кутубеков, Василий Егоров уо.д.а. бааллар. 2006 сыллаахха Александр Петров “Саха сиригэр буоксаны сайыннарыыга үтүөлэрин иһин” түөскэ кэтиллэр бэлиэнэн наҕараадаламмыта. Маны таһынан Спорт министерствотын бочуотунай грамотатынан наҕараадаламмыта. Олимпийскай солбук училищетыгар үлэлиир кэмигэр буоксаҕа РФ 18 спордун маастарын бэлэмнээбитэ. 2014 сыллаахха кини бастыҥ иитиллээччитэ Василий Егоров Варшава куоракка “А” категориялаах буокса турнирыгар иккис миэстэни ылбыта, Россия эдэрдэргэ чемпиона, Калининград куоракка эдэрдэргэ Европа призера буолбута. 2015 сыллаахха В. Егоров Россия чемпионатын кыайан Аан дойду чемпионатыгар тахсыбыта. Онно Россия чиэһин ситиһиилээхтик көмүскээн дойдуга үрүҥ көмүс мэтээли аҕалбыта уонна Олимпийскай оонньууларга кыттар путевканы ылбыта. Европа уонна Аан дойду чемпионаттарын призердара Василий Егоровка “Россия спордун үтүөлээх маастара”, оттон тренер Александр Григорьевич Петровка “Саха Республикатын буоксаҕа үтүөлээх тренерэ” үрдүк ааттар иҥэриллибиттэрэ.

         Үөһээ Бүлүү улууһун баһылыга В.С. Поскачин тренер А.Г. Петрову үлэҕэ ыҥырбыта. Александр Григорьевич Үөһээ Бүлүүгэ “Буокса оскуолатын” арыйан үлэлэтэргэ этии киллэрбитин баһылык тута өйөөбүтэ. Билигин онно 60-ча оҕо дьарыктанар. Александр Григорьевич активнай позициялаах, үлэтигэр бэриниилээх. Бары күүһүн, баай билиитин, уопутун биэрэн “Буокса оскуолатыгар” сүрүн тренер быһыытынан үлэлии-хамсыы сылдьар.