Хапсаҕайга спорт маастара Константин Мандаров кэпсээниттэн: “1973-74 үөрэх сылыгар Далыр орто оскуолатыгар үөрэнэ сылдьан бииргэ үөрэнэр Кырыкыйтан, Дүллүкүтэн сылдьар уолаттарым маннык сөҕө кэпсэтэллэрин түбэһэ истэн турардаахпын: "Дьэ, аһара өйдөөх уол эрээри, отой атын олоҕу көрөн турар курдук кэпсиир, маннык буолуохтаах, оннук уларыйыахтаах диир. Киһини да итэҕэтиэх курдук, туспа сэһэннээх уол.” “Төһөлөөх уолуй?” – диэн сэҥээрээччи буоллум. “Ээ, кыра, алтыс кылааска үөрэнэр,” – диэтилэр. Эбиитин: “Мэник-тэник мээнэ уол буолбатах,” –  диэн тоһоҕолоон биэрдилэр. Дьиктиргээбитим да, ол оннук ааспыта. Ити кэмҥэ тутул уларыйыа диэн киһи санааҕа да оҕустарбат кэмэ этэ. Үлэһит буолан баран өйдөөбүтүм, “айдарыы” уонна “этиттэрии” диэннэри. Ол оччотооҕу уол Володя Поскачин эбитин кэлин билбитим.”

Владимир Поскачин төрүт дьон төрүөҕэ, ытык дьон ыччата. Ол курдук, Боотулууга Оноҕоччут диэн Кэтириинэ ыраахтааҕы саҕана кинээстээбит, аҕа ууһун төрдө буолбут киһи сэттис көлүөнэ сыдьаана. Владимир төрүттэрэ бас-көс дьон – маамыктаах, куортуктаах кинээстэр. Аҕата Семен Герасимович бэйэтин кэмигэр салалтаҕа биригэдьииртэн саҕалаан колхоз председателигэр тиийэ тахсыылаахтык үлэлээбитэ, норуот хаһаайыстыбатын үтүөлээх аатын ылбыта. Ийэтэ Мария Алексеевна эргиэҥҥэ өр сылларга эҥкилэ суох үлэтин иһин СССР кээпэрээссийэтин туйгуна буолбута.

Кыра сааһыттан билиигэ-көрүүгэ тардыһыылаах буола улааппыта. 1978 сыллаахха Үөһээ Бүлүүтээҕи физмат оскуоланы ситиһиилээхтик үөрэнэн бүтэрбитэ. Ытык иэһин төлөөн Сэбиэскэй армия кэккэтигэр туйгуннук сулууспалаан кэлэн баран М.К. Аммосов аатынан Саха государственнай университетыгар, кэлин финансовай техникумҥа үөрэммитэ. Ити сылларга Владимир Поскачин буоксаннан утумнаахтык дьарыктанан барбыта. Бастакы тренерэ Сергей Ларионов эдэр уолу “тыыппалааҕын” бэлиэтии көрөн күүскэ ылсыбыта. Владимир күҥҥэ икки дьарыкка сылдьара – бастаан саҕаалааччылар бөлөхтөрүгэр, онтон уопуттаах боксердары кытары. Рингаҕа хас биирдии таба охсуутун олоххо туруоруммут сыалын-соругун биир кыайыытын курдук ылынара. Түргэн, күүстээх охсуулардаах уолу кэлин республика үтүөлээх тренердэрэ А.А. Тыасытов, А.П. Леонов сүбэ-ама биэрэн ситэрэн-хоторон улахан рингаҕа бэлэмнээбиттэрэ. Университекка буоксаҕа 1985, 1986, 1987 сылларга ыйааһыныгар чемпионнаабыта. Ньурбаҕа Советскай Союз Геройа Н.Н. Чусовской аатынан республиканскай турнирга бастаабыта. Уобаластааҕы ДСО “Урожай” күрэхтэһиитигэр бастаабыта. Ити курдук кэккэ ситиһиилэр кэлэн испиттэрэ. ССРС спордун маастарыгар кандидат буолбута, Саха сирин сборнай хамаандатыгар киирбитэ.

90-с сылларга дойду экономическай-политическай өттүнэн мөлтөөн, сатарыйан, Союз ыһыллан, олох дьаалытынан устан барбыта. Ханна баҕарар төрөөбүт дойдуларын туһугар туруулаһар патриот дьоннор хаһааҥҥытааҕар да наада буолбуттара. Оннук дьоннортон биирдэстэринэн, бастыҥнарынан Владимир Поскачин буолбута.

Олоххо саҥа былаас тутула кэлбитэ. Оҕо сааһыгар өйүгэр-санаатыгар өтөн киирбит “этиттэриилээх” уларыйыы-тэлэрийии кэмэ кэлбитэ. Кэм-кэрдии аныгылыы көрүүлээх саҥа дьону салалтаҕа таһаарбыта... Эдэр, эрчимнээх, инникигэ эрэллээх ыччат Владимир Поскачин Ил Түмэн депутатынан икки төгүл талыллан үрдук таһаарыылаахтык табыллан үлэлээбитэ. Ол быыһыгар “Саха кэскилэ”, “Хоһуун” общественнай, политическай хамсааһыннары тэрийбитэ. “Куорамыкы”, “Үрэн” – диэн тэрилтэлэри тэрийтэлээн ол үп-харчы кырыымчык кэмигэр дьоҥҥо-сэргэҕэ көмөлөһөн, араас культурнай, спортивнай күрэхтэһиилэри өйөөн барбыта.

ИДьМ миниистирэ В.С. Федоров буокса федерациятын президенинэн олорон Владимир Поскачины федерация вице-президенинэн ыҥыран ылбыта, үгүс элбэх күрэхтэһиилэри ыыппыттара.

2007 сылтан төрөөбүт-үөскээбит Үөһээ-Бүлүүтүгэр баһылыгынан талыллан сүрдээх таһаарыылаахтык үлэлии-хамсыы сылдьар. Билигин буолаары турар 20-с үбүлүөйдээх Манчаары оонньууларыгар үтүмэннээх үгүс үлэни ыыттара сылдьар. Саҥа стадион, спортзал, ипподром, үс аатырбыт бөҕөспүтүгэр ананар памятник оҥоһулла, “Хотун Бүлүү” памятник саҥардылла сылдьаллар. Дьэ, ити курдук улууспут аҕа баһылыга Владимир Семенович Поскачин үлэтин-хамнаһын үгэнигэр сылдьар.