Үөһээ Бүлүү улууһугар бокс саҥалыы тыыны ылан сайдарыгар 1999 с. общественнай тренер быһыытынан үлэлээбит Максим Поскачин улахан үтүөлээх-өҥөлөөх. Оччолорго боксанан дьарыктанарга аналлаах спортивнай зал суох буолан лесохрана дьиэтин оҥостон, ремоннаан зал оҥостубуттара, дьэ бу залга Максим Семенович тренерскэй үлэтин саҕалыыр. Бу кэмҥэ бокса Федерацията тэриллэр, салайааччынан Василий Викторович Николашкин талыллан үлэһит илии, чох булан-талан спортзалы ититэр, онон ханнык эмэ усулуобуйа тэриллэн, инвентарь булунан үлэлээбитинэн бараллар. 2000 сыл алтынньы 10 күнүттэн оҕо спортивнай оскуолатын иһинэн бокса секцията арыллан Максим Семенович тренер быһыытынан үлэтин салгыыр. Бу үлэлээбит сылларыгар бокса оскуолата кэҥээн-сайдан, билигин анал заллаах, хас да тренердээх, нэһилиэктэргэ филиаллардаах оскуолаҕа кубулуйда. Бу биллэн турар улуус баһылыга Владимир Семенович Поскачин быһаччы өйөбүлүнэн, көмөтүнэн тэрилиннэ. Бу тренердэр салалталарынан Үөһээ Бүлүү боксаҕа оскуолата өссө да дорҕоонноохтук ааттаныа, элбэх чемпионнары үүннэриэ диэн кэтэһэбит.