Дмитрий Руфов 1975 с. муус устар ый 4 к. Бүлүү улууһун Сыдыбыл нэһилиэгэр төрөөбүтэ. Боксанан үһүс кылаастан эрчиллибитэ. Кинини Ньурбаттан төрүттээх Алексеев Александр Иннокентьевич эрчийбитэ. Диманы тренерэ Бүлүү куоратыгар оҕо спортивнай оскуолатыгар киллэрэн тренер Иван Иванович Евсеевка уонна Дмитрий Прокопьевка туттаран 1990-1992 сс. салгыы эрчиллэр. Дмитрий оскуола кэннэ 1992 с. армияҕа ыҥырыллан сулууспалыыр. Армия кэнниттэн Олимпийскай эрэл училищетыгар киирэн үөрэнэр, салгыы эрчиллэр. Дмитрий бу кэмҥэ элбэх куоталаһыыларга кыттар. Уһук Илин, Бүтүн Союзтааҕы турнирдарга миэстэлэһэр уонна спорт маастарыгар кандидат нуорматын толорор, Саха Республикатын 1996-1997 сс. чемпиона буолар.

         Дмитрий 2007 с. Үөһээ Бүлүүгэ бокса тренеринэн үлэтин саҕалыыр. Кини эрчийэр оҕолоро араас куоталаһыыларга бастаан, миэстэлэһэн бараллар. Боксер уолаттар Евсеев Егор, Прокопьев Костя, Иванов Проня, Ильин Слава күннэтэ дьарыктанан күүстээх боксердар буолбуттара. Улууска Россия икки төгүллээх чемпиона А.Г. Петров бирииһигэр республиканскай турнир уолаттарга ыытыллара үгэскэ кубулуйда, бу турнирга бастаабыт уолаттар үрдүк ситиһиилэнэллэр, маны таһынан улууска бокс Федерациятын бирииһин иһин, үөрэх управлениетын бирииһин иһин турнирдары тэрийэн ыыталлар. Бу тэрээһиннэргэ тренер Дмитрий Руфов мэлдьи сүүрэн-көтөн тэрийсэр. 2012 с. тренер Руфов бастыҥ иитиллээччитэ Е. Евсеев Федеральнай уокурук чемпионатыгар II м ылар, салгыы Иосиф Кобзон бирииһин кыайар, Сергей Исмаилов турнирыгар бастыыр уонна “Локомотив” общество чемпиона буолан 2016 с. Россия спордун маастара буолар. Онон тренер Дмитрий Руфов Үөһээ Бүлүүгэ бокса сайдыытыгар күүскэ үлэһэ сылдьар биир элбэҕи кэтэһэр тренербитинэн буолар.