Россия хамаандатын састаабыгар 8 сыл сылдьыбыта

         Биллиилээх боксер Семен Степанов 2003 сыллаахха Саха сирин, Уһук илиҥҥи федеральнай уокурук оҕолорго чемпиона, 2004 сыллаахха “Азия оҕолоро” III спортивнай оонньуулар чемпионнара. СР хас да төгүллээх чемпиона. 2007 сыллаахха ыытыллыбыт Россия чемпионатын боруонса призера, 2008 сыллааҕы Россия эдэрдэргэ чемпиона. 2010 сылга Таилаҥҥа, Хорватияҕа, 2011 сылга Венесуэлаҕа норуоттар икки ардыларынааҕы турнирдарга иккис миэстэлэри ылбыта. 2010, 2011 сыллардааҕы Россия эдэрдэргэ чемпионатыгар иккис миэстэлэрдээх. 2011 сыллаахха Аан дойду нефть баайдаах дойдуларын Кубогын финалиһа (иккис миэстэ). 2011, 2012 сылларга Хабаровскай куоракка Советскай Союз Геройа Константин Коротков кэриэһигэр норуоттар икки ардыларынааҕы турнир чемпиона, призера. 2013 сыллаахха Россия студеннарыгар иккис миэстэ. 2012, 2014 сылларга Белоруссия кубогын уонна чемпионатын кыайыылааҕа. Семен Степанов РФ норуоттар икки ардыларынааҕы кылаастаах маастарын нуорматын толороругар биир эрэ хардыы тиийбэккэ хаалбыта.

         Семен биир кэмҥэ Россия боксердара Олимпийскай оонньууларга тахсар бүтэһик сбордарыгар саха аатырбыт боксера Георгий Балакшин эрчиллэригэр көмөлөспүтэ. Георгий чахчы эбиллибитин, охсор күүһэ аһара улааппытын, уопсай күүһэ-күдэҕэ тупсубутун, санаата бөҕөргөөбүтүн, Олимпиадаҕа үчүгэй киирсиини көрдөрөр кыахтаммытын туһунан Сэмэн кэпсээбитэ оруннаах буолбута – Россия боксера Георгий Балакшин Олимпиада боруонса мэтээлин Сахатын сиригэр аҕалбыта.

         2015 сыл бүтүүтүттэн Семен күрэхтэһэ илик, ол эрэн сааһа эдэр – 1988 сыллааҕы төрүөх, онон отой уурайыан арыый эрдэ кудук. Билигин дойдутугар Улахан Ааҥҥа олорор – ол ийэтин төрөөбүт дойдута, онно Сеня кыратыгар Кырыкыйтан бары дьиэнэн көһөн барбыттара.

Кимтэн кииннээх киһитин сырдаттахха, аҕата Иван Иванович төрүт Кырыкый, ийэтэ Розалия, үөһэ ахтыллыбытын курдук, Хаҥалас Улахан Аана. Аҕатынан эһэтэ Иван Егорович үйэтигэр киинэ үлэһитэ, ССРС киинэтин туйгуна этэ, улахан булчут, сыыспат ытааччы, куһу-куобаҕы сууһарбыт аҕай киһи, ааттаах тайахсыт, ону таһынан эһэни даҕаны хам-түм бултааччы. Иван Егорович бииргэ төрөөбүт быраата – аатырбыт тустуук Степан Егорович Степанов-Түргэн бөҕө. Кинилэр балтыларын – Мария Егоровна – орто уола Олег Егорович Иванов хапсаҕайга САССР спордун маастара. Степановтар аймах бары кэриэтэ спортсменнар, билигин сиэн элбэх, хос сиэннэр да бааллар, ол иһин инникитин да спордунан дьарыктанар оҕолор тахсан иһиэхтэригэр киһи эрэнэр. Аан дойду, Олимпийскай оонньуулар призердара, Россия спордун үтүөлээх маастара Георгий Балакшин ыйааһыныгар киирсибит, дойду сүүмэрдэммит хамаандатыгар сылдьыбыт Семен Степанов перчаткатын тоһоҕорго букатыннаахтык ыйыы илик буолуохтаах, инникитин рингэҕэ эргиллиэн сөп уонна эдэрдэри эрчийэн бэйэтин аны биир өттүттэн көрдөрүө диэн эрэниллэр.