Розалия 1997 с. Үөһээ Бүлүү улууһун Нам нэһилиэгэр элбэх оҕолоох дьиэ кэргэҥҥэ төрөөбүтэ. Аҕата Сергей Григорьевич уукааннаах балыксыт, онтон ийэтэ Алена Васильевна оҕо саадыгар үлэлиир.

         Роза оҕо эрдэҕиттэн олус сытыы-хотуу, сүүрэр-көтөр кыысчаан этэ. Кинини Нам орто оскуолатыгар улахан кылаастарга үөрэнэр кэмигэр тренер Никита Романов таба көрөн боксаннан дьарыктанарга ыҥырар. Талааннаах кыыс хара ааныттан ситиһиилээхтик күрэхтэһиилэргэ кыттан барар. Ол курдук оҕолорго 2013 с. Находка куоратыгар Уһук Илин Федеральнай уокурукка чемпионнуур, ити ситиһиитин 2014, 2016 сс. Владивосток куоракка хатылыыр, 2017 с. призер буолар. Роза 2014 с. Мииринэй куоратыгар М. Поршнев кэриэһигэр ыытыллыбыт республиканскай турниры кыайар, 2015 с. Уһук Илин Федеральнай уокурук үөрэнээччилэр ортолоругар ыытыллар VII сайыҥҥы Спартакиада I этабыгар бастыыр, ити сыл Сахаров кэриэһигэр ыытыллыбыт Бүтүн Россиятааҕы турнирга бириистээх миэстэҕэ киирсэр, Ростов-на-Дону куоракка Россия “Олимпийскай эрэллэрин” күрэхтэһиитигэр бастыыр, Россия бокска сүүмэрдэммит хамаандатын чилиэнэ буолар. Талааннаах кыыһы Россия аатырбыт боксера Оксана Владимировна Васильева-Гюрза бэйэтигэр ылан күүскэ дьарыктыыр, ол түмүгэр Розалия Уһук Илин Федеральнай уокурукка дьахталларга 2016, 2017 сс. чемпионнуур.

         Розалия Сергеевна билигин Владивостоктааҕы олимпийскай эрэллэр училищеларыгар ситиһиилээхтик үөрэнэр, боксаннан утумнаахтык, дьаныардаахтык эрчиллэр. Кыыспытыгар үөрэҕэр үрдүк ситиһиилэри, боксатыгар чаҕылхай кыайыылары баҕарыаҕыҥ!