Петр Бубякин 6-с кылааска үөрэнэ сылдьан волейбол, баскетбол оонньууларынан ылларан туран дьарыгырбыта. Бастакы тренерэ Петров Петр Егорович этэ. Сайыҥҥы өттүгэр Бүлүү өрүс үрдүгэр РДК утары икки волейбол площадката баара, ону таһынан икки площадка пааркаҕа баара. Ол оннугар кыһыҥҥы өттүгэр волейбол, баскетбол оонньуурга уустук этэ, онно сөптөөх зал суоҕа. Ол бириэмэҕэ оройуон күүстээх оонньооччуларынан Бырдакаров В.А., Одорусов П.П., Васильев Е.Д., Петров П.Е. буолаллара. Сайыҥҥы өттүгэр оҕолор оттуур лааҕырдарын аайы волейбол оонньуута тэриллэрэ. Онтон 1970-нус сыллар саҕаланыыларыгар арыый да улахан зал тутуллан волейболга кыһыннары оонньуур буолбуттара, волейбол оонньуута иккис тыынын ылбыта, оҕолор, ыччаттар бу оонньуунан дьарыктаналлара күүһүрбүтэ. Ол кэмҥэ эдэр физруктар Зоя Васильевна, Дмитрий Дмитриевич Тарабукиннар волейбол, баскетбол оонньуутун өрө тардыбыттара.

         1973 с. Дьокуускайга волейболга куоталаһан кэлбиттэрэ, төһө да миэстэлэспэтэхтэрин иһин үчүгэйдик оонньообуттара, оҕолор республика бастыҥнарын кытта үчүгэйдик оонньоон санаалара күүһүрбүтэ, өссө күүскэ дьарыктанар буолбуттара. Бу кэмҥэ волейболга эрчиллибит оҕолор оскуоланы бүтэрэн үөрэнэ, сорохторо сулууспалыы барбыттара. Петр Бубякин Камчаткатааҕы пединститутка үөрэнэ киирэр. Манна салгыы эрчиллэн I разрядтаах волейболист буолар. Петр үөрэҕин бүтэрэн баран 6 сыл Камчаткаҕа үлэлиир, бу да сылларга волейболунан күүскэ дьарыктанар. 1986 с. дойдутугар кэлэн И. Барахов аатынан оскуолаҕа үлэлиир уонна эмиэ умнууга хаалбыт волейбол секциятын арыйан оҕолору дьарыктыыр, кэргэнэ Надежда Бубякина эдэр кыргыттары мунньан хамаанда тэрийэн күүскэ дьарыктанан бараллар. Надежда тэрийбит хамаандата улуус чиэһин элбэх сылларга ситиһиилээхтик көмүскээбитэ. Ити сылларга волейболга оонньообут эр дьон хамаандатын састааба маннык этэ: Бубякин П., Боескоров И., Герасимов А., Слюгров Р., Тимофеев А., Аввакумов Г., Болтоков Н. Бу хамаанда “Урожай” ДСО уобаластааҕы Сэбиэтигэр III м ылбыта. Петр Бубякин “Бастыҥ оонньооччу” бириһиинэн наҕараадаламмыта. Бу хамаанда хас да сылларга Бүлүү бөлөх улууһугар хотторботох хамаанда этэ. Бу кэмҥэ улуус волейболга хамаандатын оонньооччулара А. Герасимов Боотулууга, Слюгров Р. Далырга, Болтоков Ороһуга, Гаврильев П., Николаев Т., Аввакумов Г. улуус киинигэр волейбол оонньуутугар оҕолору, ыччаттары дьарыктаабыттара. Онон волейбол 1990-нус сылларга балайда сайда сылдьыбыта.

         ХХ Манчаары Спартакиадата Үөһээ Бүлүүгэ буоларынан аныгылыы волейбол, баскетбол оонньуур саалалардаах улахан спортивнай саала үлэҕэ киирдэ, онон волейбол оонньуута өссө сайдыа турдаҕа. Ити саҥа спорт дыбарыаһа тутуллуутунан улуус оҕолоро, ыччаттара спордунан дьарыктаналларыгар сөптөөх, үчүгэй усулуобуйа оҥоһуллан эрэр. Түмүккэ ааспыт үйэ тоҕус уонус сылларыгар улууска волейбол оонньуутугар сэмэй кылаатын киллэрбит, I спортивнай разрядтаах Петр Николаевич Бубякин буолар. Петр Николаевич өр сылларга тулаайах оҕолор дьиэлэрин директорынан үтүө суобастаахтык үлэлии сылдьар, Россия үөрэҕириитин бочуоттаах үлэһитэ, Саха Республикатын үөрэҕириитин туйгуна. Бу кэмҥэ Петр Николаевич үөрэ-көтө сылдьар, саҥа спорт дыбарыаһа тутуллан эдэр ыччат чөл олоҕу тутуһарыгар, волейбол, баскетбол оонньууругар сөптөөх усулуобуйа тэриллэн эрэриттэн сүргэтэ көтөҕүллэр.