1957 с. алтынньы 15 к. Уус-Маайа оройуонугар төрөөбүтэ. Исидор Барахов аатынан оскуолаҕа үөрэнэ сылдьан физкультура учууталлара Юрий Герасимович Сергеев, Зоя Васильевна уонна Дмитрий Герасимович Тарабукиннар салалталарынан сүүрүүнэн, волейболунан, баскетболунан дьарыктаммыта.

1975 с. Надя оскуоланы бүтэрээт Дьокуускайдааҕы медицинскэй училищеҕа үөрэнэ киирэр. Училищеҕа Николай Семенович Иванов салалтатынан спордунан салгыы дьарыктанар, училище хамаандатыгар киирэр, “Социалистическая Якутия” хаһыат бирииһигэр үгэс буолбут эстафетаҕа орто үөрэх тэрилтэлэрин бөлөҕөр хаста даҕаны бастыыр.

1978 с. үөрэҕин бүтэрэн иккис дойду оҥостубут Үөһээ Бүлүүтүгэр медсестра дипломнаах эргиллэн кэлэр, манна саҥардыы үлэлээн иһэн оскуолаҕа бииргэ үөрэммит уолугар Петр Николаевич Бубякиҥҥа кэргэн тахсар. Петр математика учуутала, бэртээхэй спортсмен.

Кини капитаннаах улуус киинин дьахталларын волейболисткаларын хамаандата сүүрбэ сыл устата улууска иннин биэрбэккэ сылдьар. Улуус дьахталларын волейболга сүүмэрдэммит хамаандата (капитан Надежда Бубякина) Бүлүү зонатыгар 1988 с. саҕалаан элбэхтэ бастаабыта, “СахаВА” волейбол ассоциациятын республикатааҕы күрэхтэһиитигэр Надя Бубякина капитаннаах Үөһээ Бүлүү волейболист кыргыттара икки төгүл (Уус-Алдаҥҥа уонна Мэҥэ-Хаҥаласка) үһүс миэстэлэргэ тахсыбыттара. Ити кэмнэргэ Надежда Бубякинаҕа “Бастыҥ көмүскээччи”, “Бастыҥ оонньооччу”, “Бастыҥ нападающай” диэн анал бириистэр “Сахаада” уонна Бүлүү зонатын күрэхтэһиилэригэр туттарыллыбыттара.

1988 с. Покровскайга ыытыллыбыт республика тыатын сирин III спортивнай оонньууларыгар Үөһээ Бүлүү хамаандата волейболга дьахталларга үһүс бириистээх миэстэҕэ тахсыбыта. Итиннэ Надежда Бубякина күүстээх оонньооччу быһыытынан улахан төһүү күүс буолбута. Надяны кытта хамаанда састаабыгар бааллара: Ороһу ыанньыксыта Таня Антонова, учуутталар Лена Слюгрова, Наталья Михайлова, Марина Обулахова, типография үлэһитэ Оксана Халанникова, спортинструктор Надя Иванова, Далыртан культура үлэһитэ Фрося Софронова. Ити оонньууга Н. Бубякина сүүрүүгэ щведскэй эстафетаҕа республикаҕа үһүс миэстэҕэ тахсан, иккис төгүлүн боруонса мэтээли иилиммитэ.

Н.В. Бубякина үрдүк уҥуохтаах, бэйэтин олус кыанар волейболистка. Кини спортивнай режими тутуһар буолан өр сылларга күүстээх спортсменка быһыытынан билиннэ. Кини билигин киин балыыһа хирургическай отделениетыгар медсестранан таһаарыылаахтык үлэлиир.