Саша 1970 с. олунньу ый 20 к. Припузовтар дьиэ кэргэннэригэр Хаҥалас улууһугар төрөөбүтэ. Онтон Үөһээ Бүлүүгэ оҕо дьиэтигэр иитиллибитэ, Саша 1973-1985 сс. бу дьиэҕэ улааппыта, үөрэҕин бүтэрэн баран Ленинград куоракка ГПТУ-18 үөрэнэн штукатур-маляр идэтин баһылаабыта, Байконурга Советскай армия кэккэтигэр сулууспалаабыта. Армия кэнниттэн Үөһээ Бүлүүгэ оҕо дьиэтигэр инструкторынан үлэлии сылдьан 1993 с. Далыр кыыһын Марфаны кытта ыал буолана Далырга көһөн тахсыбыта. Сашалаах Марфа бэркэ табыллан олороллор, билигин биэс оҕолоохтор, үлэлээхтэр, сүөһү-ас туталлар, киэҥ-куоҥ оҕуруот, теплица сирдээхтэр.

         Александр кыра эрдэҕиттэн спордунан дьарыктанар, ол курдук мас тардыһыытыгар, хайыһарынан, сүүрүүнэн дьарыктанара уонна гиирэни, штанганы көтөҕөлүүрэ. 1989 с. ыла гиирэнэн күүскэ ылсан дьарыктаммыта. Бастакы тренерэ Сергей Спиридонов. Саша гиирэнэн дьарыктанан улуус элбэх төгүллээх чемпиона, республика элбэх төгүллээх чемпиона, призера. 2000 с. СР гиирэ спордун маастара, онтон 2009 с. РФ спордун маастарыгар кандидат буолар. Александр Васильевич 40 сааһын да туолан баран эдэрдэргэ да, ветераннарга да ситиһиилээхтик кыттар. Ол курдук быйыл эдэрдэр ортолоругар СР чемпиона буолла. Александр кэнники биэс сылга кыайбыт күрэхтэһиилэрэ манныктар: 2010 с. V спортивнай оонньууларга (Өлүөхүмэ куората) II м, ити сыл Дьокуускай куорат гиирэҕэ чемпионатыгар I м. Александр Васильевич спортка ситиһиилэрин иһин СР спордун миниистирэ М. Гуляев Бочуотунай грамотатынан наҕараадаланар. 2011 с. Дьокуускай куорат аһаҕас чемпионатыгар I м, СР гиирэҕэ Федерациятын кубогар I м, Дьокуускай куоракка ыытыллыбыт күүс көрүҥнэригэр фестивалын чемпиона. 2012 с. “Урожай” общество чемпионатыгар I м, гиирэ спордун Федерациятын президенэ Курнев В.Т. бирииһигэр I м.

         Александр Васильевич гиирэ спордугар оскуола оҕолорун дьарыктыыр. Кини эрчийэр оҕолоро ситиһиилэрэ үрдүгүн иһин миниистир А.С. Владимиров Бочуотунай грамотатынан наҕараадаланар, бу сыл улуус бастыҥ спортсмена буолар.

         2016 с. Александр Данилов сулустаах сыла. 46 сааһыгар сылдьан Россия спордун маастарын нуорматын толорор. Дьэ санаан көрүҥ, хайдахтаах дьаныарый ветеран буолбута 6 сыл буолан баран, эдэрдэр ортолоругар маастар нуорматын толоруу диэни. Бу элбэх эрчиллииттэн, бэйэҕэ эрэлтэн, спортивнай режими тутуһууттан, дьиэ кэргэн өйөбүлүттэн, көмөтүттэн тахсар.

         Александр Васильевич бэрт өр сылларга Далырга оҕолору ситиһиилээхтик  дьарыктаата. Кини эрчийэр уолаттара Дима Михалев, Степан Егоров, Никандр Тимофеев уо.д.а. республика чемпионнара, призердара, бастыҥнара буоллулар. Дмитрий Михалев Россия спордун маастара, Никандр Тимофеев Россия оҕолорго үрүҥ көмүс призера буолла. Александр Данилов спортка уһуйбут уолаттара хайыы-үйэ үөрэҕи бүтэрэн, үлэлии-хамсыы сылдьаллар. Ол курдук Степан Егоров физкультура учуутала, Кузьмин Захар тренеринэн үлэлиир, Дима Михалев быйыл үөрэҕин бүтэрэр.

         Александр Васильевич өр сыллаах дьаныардаах үлэтэ сөптөөхтүк сыаналанна. Ол курдук кини Далыр нэһилиэгин бочуоттаах олохтооҕо, Үөһээ Бүлүү Баһылыгын элбэх Махтал суруктарынан, Бочуотунай грамоталарынан, СР спордун министрин Махтал суруктарынан, Бочуотунай грамоталарынан, Үөрэх министерствотын Махтал суруктарынан, грамоталарынан наҕараадаламмыта. Кини итини таһынан “Саха сирэ - Россия 375 сыла”,  “Саха сиригэр спорт сайдыытын 90 сыла” бэлиэлэринэн  наҕараадаламмыта. Дьэ ити курдук Александр Васильевич Данилов таһаарыылаахтык үлэлии-хамсыы, айа-тута, күрэхтэһэ сылдьар. Киниэхэ ситиһиини баҕарыаҕыҥ!