Степан Алексеевич 1991 с. Оҥхой нэһилиэгэр Егоровтар дьиэ кэргэттэригэр иккис оҕонон төрөөбүтэ.

Оҥхойго үөрэнэр кэмнэригэр үөрэҕи, спорду тэҥҥэ дьүөрэлээн улааппыта. Ордук сүүрүүнэн дьарыктаммыта уонна араас ыарахан тимирдэри көтөҕөлүүр идэлээх эбит. Үчүгэй дьиссипилиинэлээх, активнай уолу оскуола президенинэн талбыттара. Оҥхой оскуолатын ситиһиилээхтик бүтэрэн баран Далыр орто оскуолатыгар үөрэнэ барбыта. Манна Саха Республикатын спордун маастара, РФ спордугар маастарга кандидат Алексей Васильевич Данилов секциятыгар киирэн гиирэнэн эрчиллэн барбыта. Ыарахан тимирдэринэн мээчиктэнэ оонньуура манна олус туһалаабыта. Элбэх ситиһиилэр бииртэн биир баар буолан испиттэрэ.

Степан Алексеевич 2009 с. Бүлүүтээҕи педагогическай колледж физкультурнай салаатыгар үөрэнэ киирбитэ. Манна РФ, СР спордун маастара Павлов Эдуард Григорьевич тренердээбитэ. Бүлүүгэ үөрэнэр кэмнэригэр сааһа ситэн армияҕа ыҥырыллыбыта. Уссурийскайга,  Курильскай арыыларга сулууспалаабыта, сулууспалыы сылдьан гиирэ анньыытыгар дивизия чемпионатыгар 1 миэстэлэри ылаттаабыта.

Степан Алексеевич ахсаана биллибэт элбэх күрэхтэһиилэртэн саамай улахан ситиһиилэрэ:

—    2009 с. Далырга гиирэҕэ Үөһээ Бүлүү чемпионатыгар 1 миэстэ.

—    2009 с. Чурапчыга республикаҕа оҕолорго чемпионатыгар 1 миэстэ. Оҕолорго 65 кг. рекорд олохтообута, абсолютнай чемпион буолбута, бу сыл Бүлүүгэ Манчаары Спартакиадатыгар улахан дьон командатыгар киирсэн 75 кг 5 миэстэлэммитэ,

—    2010 с. Россия чемпионатын Азиатскай зонатыгар Россия чемпионатын 4 миэстэлэммитэ,

—    2013 с. Чурапчыга ыытыллыбыт Манчаары Спартакиадатын чемпиона буолбута.

—    2014 с. Намҥа 6-с спортивнай оонньууларга (85 кг) бастаабыта.

—    2015 с. Тааттаҕа гиирэ спордун Федерациятын Кубогар 2 миэстэлээх.

Итини таһынан улуус, нэһилиэк күрэхтэһиилэригэр кыттан элбэх төгүллээх чемпион. Саха Республикатын түөрт төгүллээх чемпиона.

Спортсмен дьаныардаах үлэтинэн, эрчиллиитинэн элбэҕи ситиспитэ, ол курдук  2010 сылга СР спордун маастара, РФ спордун маастарыгар кандидат буолбута.

Степан Алексеевич үөрэнэ сылдьан эмиэ физрук идэлээх Тиксии Таймылыырыттан төрүттээх Сюзанна Валентиновнаны кытта 2011 с. ыал буолбута. Икки оҕолоохтор. Степан Алексеевич Оҥхой ситэтэ суох орто оскуолатыгар физкультура учууталынан үтүө суобастаахтык үлэлиир. 2017 с. ыытыллыахтаах Манчаары Спартакиадатыгар кыттарга бэлэмнэнэр уонна оҕолору бэлэмниир.

Спортсмен уолбут өссө да кыайыылары аҕалыа диэн олохтоохтор сэмээр кэтэһэбит уонна эрэнэбит.