Степан Васильевич 1940  с. атырдьах ыйын14 күнүгэр Алын Аһыкайга Федорова Мария Николаевна уонна кэриэй Ким-Ен-Тэги (советскай паспорынан Ким Антон) дьиэ кэргэнигэр үһүс оҕонон төрөөбүтэ.

1933 сылтан саҕалаан Үөһээ Бүлүүгэ кытайдар кэлбиттэрэ. Дьоҕурдаах оҕуруотчуттар колхозтарга тарҕанан олорбуттара. Степан кыратыгар оҕуруотчут Ван-Сен-Жун-Кытай Бааскаҕа иитиллибитэ.

Степан оҕо сылдьан сайыҥҥы өттүгэр оҕуруокка үлэлээн, окко оҕус сиэтэн үлэтин саҕалаабыта. Кини кыра сааһыттан үлэҕэ, булка эриллэн улааппыт буолан сүрдээх кытыгырас, кыайыгас-хотугас этэ. Ол кэмнэргэ оҕо ахсаана аҕыйах буолан кылаастар икки ардыларыгар күрэхтэргэ бары көрүҥҥэ барытыгар кыттара, инньэ гынан спорт элбэх көрүҥэр бэйэтин күүһүн холоноро. Ол курдук, үөрэнэр кэмигэр улахан дьоҥҥо тустууга оройуоҥҥа кыттан, спорт аанын арыйбыта. Кини оскуолаҕа үөрэнэр, туста сатыыр кэмигэр спортзал, тустуу көбүөрэ орто оскуолаларга эрэ баара, инньэ гынан улахан киһи дьарыктанарыгар, сайдарыгар усулуобуйа суоҕа, эгэ тренер кэлиэ дуо?!

Степан кэлин улаатан баран Дьокуускай куоракка крановщик курсун бүтэрэн тутууга үлэлээбитэ. Онно куоталаһа-куоталаһа иккис этээскэ кирпииччэ сүгэн таһаарара. Онтон кэлин Үөһээ Бүлүүгэ кэлэн үлэлээбитигэр, техникаҕа сыстаҕаһын иһин Ньурбаҕа суоппардар курстарыгар ыытан үөрэттэрбиттэрэ.

Степан 1960 сылтан суоппарынан үлэлээбитэ, Газ-53 массыынаннан мас таһаллара. Степан соҕотоҕун курууччута суох сылдьыбыт түгэннэрэ элбэхтэр. Кыанар буолан спорт араас көрүҥнэригэр кыттыбыта. Мас тардыһан, тустан, гиирэ көтөҕөн көрбүтэ. Биирдэ РСФСР чемпиона Петр Алексеевы хапсаҕайга кыайа сыспыт түгэнэ кытта баара. Урут республика күрэхтэһиитин иннинэ 7-10 күннээх эрчиллэр сбордар диэн ыытыллаллара, онно даҕаны кыттыахтаах эрэ киһи ыҥырыллара. Аны үлэлиир тэрилтэҥ сүгүн көҥүллээбэккэ, үксүн олох даҕаны эрчиллибэккэ күрэхтэһэ бараллара. Ити курдук Степан  биирдэ даҕаны форматыгар киирэн күрэхтэспэтэҕэ, онон дьиҥ кыаҕын ситэ туһамматаҕа. Үлэтин быыһыгар дьиэтигэр, тиэргэнигэр эрчиллэргэ арай гиирэ табыгастаах курдуга. Итинник эрчиллэн Степан райпотребсоюз систематыгар үлэлии сылдьан, икки бууттаах гиирэни үөһэ быраҕалаан мээчик курдук оонньуура. Оччотооҕу оройуоҥҥа буолар спортка күрэхтэһиилэргэ оскуолалар, комсомольскай тэрилтэлэр, хаһаайыстыбалар булгуччу кытталларын ирдииллэрэ. Степан даҕаны күрэхтэһиилэргэ араас көрүҥнэргэ элбэхтик кыттыбыта, ол эрэн гиирэ спордугар үрдүк көрдөрүүлэри ситиспитэ.

Саха АССР норуоттарын V  Cпартакиадатын 1966 сыл кыайыылаахтарынан Үөһээ Бүлүүттэн куобахха Никифор Иванов —  36 м 70 см куобахтаан, хапсаҕайга орто аҥардаах ыйааһыҥҥа Николай Корякин, гиирэ анньыытыгар Степан Егоров (чэпчэки ыйааһын) чемпионнарынан буолбуттара. Үөһээ Бүлүү 55 саастаах спортсмена Кирилл Саввинов (Айаахап) мас тардыһыытыгар эдэрдэри кыайталаан үһүс бириистээх миэстэҕэ тахсыбыта. Үөһээ Бүлүү хамаандата бу спартакиадаҕа үһүс миэстэлэммитэ.

1969 сыл  “Урожай” ДСО уобаластааҕы Сэбиэтэ Манчаары бирииһигэр Спартакиаданы иккис сылын ыыппыта, барыта  16  оройуонтан 354 киһи кыттыыны ылбыта. Бу Спартакиада түөрт көлүөнэ күрэхтэһиитин быһыытынан ыытыллыбыта. Мэҥэ-Хаҥалас оройуонун киинигэр Майаҕа үс күн устата бастакы миэстэ иһин бүтэһик хапсыһыыларга диэри сытыы киирсиилэр буолбуттара. Биһиги оройуонтан барыта, судьуйалардыын 37 киһи кыттыыны ылбыта. Гиирэ анньыытыгар 60  кг Александр Хворов 97 очкону ылан саҥа рекорду олохтообута уонна эрэллээхтик чемпионнаабыта,  Степан Егоров уонна Владимир Ханды төрдүс, Ион Николаев иккис буолбута. Үөһээ Бүлүү хамаандата гиирэҕэ анньыытыгар иккис, Уус-Алдан үһүс болбуттара. Степан ити Спартакиадаларга инники соҕус кэккэҕэ сылдьыбытыттан билигин астына саныыр. Саха АССР V Cпартакиадатын чемпионун аатын ылбытыттан бэйэтэ да соһуйбута. Маны таһынан кэрэ, чуор куоластаах ырыаһыт быһыытынан Үөһээ Бүлүүтүн чиэһин республикаҕа, Бүлүү зонатын таһымыгар элбэхтик көмүскээбитэ. Дьиэ кэргэнигэр тапталлаах кэргэн, аҕыс оҕо амарах аҕата. Оҕолоро бары ыал, үлэһит дьон буоллулар. Степан Васильевич 22 сиэн,  6 хос сиэн тапталлаах эһэлэрэ. Степан Васильевич ситиһиилээх үлэтин оччотооҕу  салалта үрдүктүк сыаналаан элбэх ахсааннаах Бочуотунай грамоталарынан, сыаналаах бириэмийэлэринэн бэлиэтэммитэ. Партия райкомунан  “Коммунистическай үлэ ударнига” диэн бочуоттаах аат иҥэриллэн, кини үлэтэ холобурга тутуллубута. Үлэ ветерана Степан Васильевич билигин да чөл олоҕу тутуһар,  76 хаарын үктүөр дылы водовоз массыынатынан бар дьонугар уу баһан хааччыйан дьон махталын ылыан ылар. Кини 56 сыл устата тохтоло суох суоппардаабыт улууска соҕотох киһи.