Ити Марианна биир дойдулаахтара Дүллүкүлэр таптаан ааттыыр ааттара. Марианна Яковлевна Ильина 1972 с. от ыйын 9 к. Дүллүкүгэ төрөөбүтэ. Дьоно Дьаакып, Маарыйа Ильиннэр элбэх оҕолоох ыаллар, оҕолор бары кэриэтэ бөдөҥ-садаҥ дьон, ол эрэн оҕолортон Марианна эрэ спордунан дьарыктанар.

         Марианна Ильина маҥнай мас тардыһара, онтон Дүллүкү ыһыаҕар тустан хототтообута, аатырбыт тустуук Валерий Федоров 50 сааһын туолар юбилейдаах тустуутугар дьахталлар ортолоругар ыарахан ыйааһыҥҥа тустан бастыыр. Саха сиригэр гиирэ спорда атаҕар туран дьахталлар кытта куоталаһар буолаллар, Марианнаны сыыйа гиирэ тренерэ Н. Кардашевскай кэпсэтэн, тылыгар киллэрэн мас тардыһыытыттан гиирэҕэ көһөрөр, ситиһии уһаабат, улуус чемпионката буолан улууһун чиэһин көмүскүү республика диэки куоталаһа бараттыыр буолар.

         Ол курдук Марианна 2010 с. Саха сирин спортивнай оонньууларыгар бастакы улахан куоталаһыытыгар IV м ылар. Ити дьыл республикаҕа үлэ коллективтарын күрэхтэһиитигэр бастыыр, 2011 с. СР чемпионатыгар гиирэҕэ III м ылар, 2011 с. Федерация кубогар II м, 2012-2013 сс. республика чемпионатыгар II-III м ылар, 2014-2015 сс. республика чемпионатыгар эмиэ III-II м ылар. Бу сылларга улуус командата Федерация Кубогар бастыырыгар Үөһээ Бүлүү хамаандатын биир эрэллээх гиревигэ, Федерация Кубогын 2 төгүллээх хаһаайына буолар. Ааспыт Манчаары Спартакиадатыгар II м ылар,  2016 с. гиирэ көтөҕүүтүгэр СР чемпионун үрдүк аатын сүгэр.

         Марианна сыллата элбэх куоталаһыыга кыттар, ол курдук мас тардыһыытыгар 2012, 2016 сс. республика чемпионатыгар III м ылбыта, улууһун солбуллубат чемпионката, Бүлүү зонатын чемпиона уонна муҥутуур кыайыылааҕа. Ити 2009 с. ситиһиитэ. Марианна 2013 с. улуус 10 бастыҥ спортсменын иһигэр киирэр, 2014 с. Россия спордун гиирэ көтөҕүүтүгэр маастарга кандидат нуорматын толорор.

         Марианна бу сорох куоталаһыыга бастаабытын эрэ ахтыыга тистибит. Кини сайын арыы собуотугар рабочайынан үлэлиир. 2017 сыл Марианнаҕа элбэх түбүктээх сыл, ол курдук ХХ юбилейдаах Манчаары оонньууларыгар Үөһээ Бүлүүттэн төрөөбүт түөлбэтин көмүскээн гиирэ анньыахтаах. Бэйэтэ күннэтэ эрчиллэр уонна улуус тэрийэр сбордарыгар дарыктанар, Спартакиадаҕа ситиһиилээхтик кыттарга суоттанар. Маны таһынан саҥа дьиэ туттар, онон түбүк элбэх эрээри бириэмэтин сөпкө аттарынан үлэлиир, куоталаһар, дьарыктанар. Түмүккэ Марианна Яковлевна туруоруммут соругун толоруоҕар баҕарыаҕыҥ.