Дима Михалев 1993 с. алтынньы 31 к. Кырыкый нэһилиэгэр Дмитрий, Мария Михалевтар дьиэ кэргэннэригэр төрөөбүтэ. Аҕалара Далырга үлэҕэ ананан көһөллөр, оҕолоро циркэ студиятыгар дьарыктаналлар, үөрэнэллэр. Кыра Дима баардыгар диэххэ сөп, гиирэ спордун фаната, Саха АССР спордун маастара, СР элбэх төгүллээх чемпиона, призера Александр Васильевич Данилов Далыр орто оскуолатыгар үлэҕэ ананар уонна үлэтин таһынан оҕолору гиирэ анньыытыгар дьарыктыыр, Дима хас да сыл бу дьарыкка сыстыбат, кыра сылдьан хатыҥыр, хачаайы баҕайы этэ, онон эбитэ буолуо, спордунан соччо дьарыктаммат, ол эрэн адьас кыра эрдэҕиттэн сайынын Кырыкыйга тиийэн таайдарын Гаврил, Савва Васильевтары кытта оттоһор, кустаһар, балыктаһар, үлэҕэ күүскэ эриллэр. Оттуур сирдэрэ Олуҥданан, Аппайа үрэҕинэн баар. Аппайа үрэҕэ талаҕа, дулҕата, кумаара, кырдаайыта, ханнык да бэйэлээҕи тулутуо суох курдуга, ону ол диэбэккэ Дима окко үлэлэһэрэ, сайыны барыыра. Дьэ ол үлэлэр түмүктэрэ кэлин гиирэ анньарыгар туһалаабыт буолуон сөп. Ол курдук уол талах курдук улаатан, хоройон испитэ, ол эрэн 10 кылааска дылы хачаайы этэ. Александр Васильевич ыҥырыытынан 10-с кылааска үөрэнэригэр гиирэҕэ эрчиллэ кэлэр. Хаһан да буоларын курдук маҥнай ыарырҕатар, соччо киһи кэрэхсиэ суох спордун курдук этэ. Онтон өр буолбат, эһиилигэр дьэ биллэн-көстөн барар. Улууска бастыыр, оҕолорго республикаҕа миэстэлэһэр, күүстээх гиревик буолара биллэн барар. Сүрдээхтик эт туппат, ол эрэн иҥиир-ситиир кытаатан, күүстээх көрүҥнэнэр. Оскуола кэнниттэн тута РФ армиятыгар сулууспалыы барар, манна да гиирэтин дьарыгын бырахпат, эрчиллэр. 2013 с. Манчаары Спартакиадатыгар Чурапчыга, сулууспалыы сылдьан кэлэн кыттар уонна II миэстэни ылар. Уол армия кэнниттэн кэлэн үөрэххэ киирэр уонна Василий Николаевич Дьячковскайга эрчиллэр,  2014 с. РФ спордун маастара буолар. Ити дьыл Россия Азиятааҕы чааһын чемпионатыгар эдэрдэргэ II миэстэни ылар. Көрдөрүүтэ лаппа тупсар. Эмиэ ити сыл Россия эдэрдэригэр (20 саастаахтарга) III миэстэни ылар, Саха Республикатыгар 2014, 2015, 2016 сс. бастаталыыр, ыйааһыныгар лидер буолар. 2015 с. көрдөрүүтэ лаппа тупсар, ол курдук толчокка 32 кг гиирэни икки илиитинэн тэҥҥэ 91 төгүл өрө анньар, рывокка 59 очкону хомуйан 150 очколанар, лаппа үчүгэй көрдөрүүлэнэр. Дьэ манна  170 очкону хомуйан аан дойду кылаастаах маастар буоларга 20 очко наада буолар. Бу 20 очко наһаа элбэҕэ суох курдук эрээри Саха сиригэр ким да ыла илик көрдөрүүтэ. Дмитрий тренеринээн 170 очкону толорорго дьаныардаахтык, элбэх көлөһүнү, сыраны-сылбаны ылар эрчиллиигэ киирэллэр. Көрдөрүү кыралаан эбиллэр. Быйыл Россия Азиятааҕы чааһын куоталаһыытыгар сыал-сорук туруорунан дьарыктана сылдьар, тренерэ Василий Николаевичтыын сыралара таах хаалбата буоллар бэрт буолуо этэ. Онно төрүөттэр бааллар, тоҕо диэтэххэ, Дмитрий 2016 с. Россия Азиятааҕы чааһын чемпионатыгар II миэстэ, Аан дойду кубогар II миэстэ буолар. Дмитрий билигин СР сүүмэрдэммит хамаандатыгар киирэн сборга сылдьар, сотору улахан куоталаһыылар, онтон от ыйыгар юбилейдаах ХХ Манчаары Спартакиадата буолаллар. Дмитрий Михалев эдьиийэ Лариса Евдокимова Россия хотугу многоборьеҕа икки төгүллээх чемпиона бу улахан түһүлгэҕэ кыттардыы, улуустарын чиэһин көмүскүүрдүү бэлэмнэнэ сылдьаллар. Манна эбэн эттэххэ  аҕалара Дмитрий Васильевич Михалев бэйэтин лаппа кыанар, ытаһа киһи. Ол эрэн спортка улаханнык сыстыбатаҕа. Быйылгы Манчаары Спартакиадатыгар төһө да сааһырдар ветераннарга мас тардыытыгар кыттаары Уус-Алдан улууһугар СР чемпионатыгар оонньууларга кыттар путевка былдьаһыылаах күрэххэ барда.

Дима, Лариса өскө спорт атын да көрүҥнэринэн дьарыктаммыттара да буоллар ситиһиилэр баар буолуо этилэр дии саныыбыт. Ол курдук бэйэлэрин кыанар, дьаныардаах, күүстээх санаалаах оҕолор. Онон түмүккэ икки биллиилээх спортсмен оҕолордоох Михалевтар дьиэ кэргэттэригэр уонна кыра Димаҕа баҕарбыт баҕата туоларыгар алгыспытын тиэрдиэҕиҥ.