Аркадий Руфов төрүт Дүллүкү олохтооҕо. Николай Руфович Руфов дьиэ кэргэнигэр 1974 с. төрөөбүтэ. Убайдара Руф, Владимир, Егор, Степан бары бэйэлэрин кыанар дьон. Аҕата Ньукулай 1941 с. төрүөх булчут, тутуу үлэһитэ. Оҕонньор бастакы түүлээҕин 1941 с. сельпоҕа туттарбыт уонна бу быйылга дылы бултуур, онон уолаттарын барыларын кэриэтэ булка үөрэппитэ, уолаттар эдэрдэригэр салаасканан бултарын тэрилин соһо сылдьан бултууллара, тоҥуу хаарынан, талахтаах, дулҕалаах сиринэн иҥнибэккэ сылдьан бултаналлара, тииҥнээх дьыл Далыр, Хоро, Оҥхой, Хомустаах сирдэринэн атахтарынан сылдьан тииҥнииллэрэ үһү. Булт бөҕөнү бултаан “Дүллүкү” совхоз бастыҥ булчуттара буолаллара. Атахтарынан да кыаналлара бэрт буолан, оҕо эрдэхтэриттэн,  оскуолаҕа үөрэниэхтэриттэн эрчиллэн Аркадий бэркэ сүүрэрэ, ол эрэн гиирэни сүрүн дьарык гыммыта. Анал тренер суоҕа, онон үчүгэй былаана суох дьарыктанара уонна ыйааһыны элбэхтик үүрэрэ, ол эрэн улууһугар бастыҥ этэ. Хас да төгүл Манчаары Спартакиадатыгар кыттыбыта, ону таһынан СР чемпионатыгар сылын аайы кыттара. Бүлүүтээҕи Манчаарыга III м ылбыта, ол кэнниттэн республика чемпионатыгар миэстэлэспитэ, биир дьыл үлэ коллективтарын ортотугар Россияҕа кыттан миэстэлэһэн турар. Ол күрэхтэһиигэ РФ спордун маастарыгар кандидат нуорматын толорбута. Быйылгы дойдутугар буолар Манчаары Спартакиадатыгар кыттарга быраабы ылаары республика чемпионатыгар кыттан III м ылбыта уонна аны сайын финалга кыттардыы эрчиллэ сылдьар, икки улахан уола Миша, Коля аны сайын улуустарын чиэһин көмүскүөхтэрэ, онон аҕа уолаттарын кытта Манчаары Спартакиадатыгар кыттардыы оҥостоллор. Аркадий Руфов элбэх сылгы, ынах сүөһү ииттэр, от бөҕөнү оҕолорун кытта оттуур, кыһын-сайын түбүктээх үлэлээх киһи, аны ону таһынан гиирэ анньыытыгар улуус хамаандатыгар баар буолан дьарыктанар, МПЧ-6 Дүллүкү нэһилиэгин байыаһа. Аны сайын буолуохтаах Манчаары оонньууларыгар Аркадийга уолаттара Мишаҕа, Коляҕа  кыайыыны баҕарыаҕыҥ!