:  Эргиччи сайдыылаах, төрүттэрин удьуордаан бөҕө-таҕа, үлэһит, булчут киһи

         Бу маннык тыллар бу кэмҥэ Орто-Халымаҕа олорор уонна үлэлиир Руф Николаевич Руфовка лоп бааччы сөп түбэһэллэр. Ону Руф туһунан сырдатан истэххэ дьон-сэргэ итэҕэйиэ дии саныыбыт.

         Руф 1953 с. Үөһээ Бүлүү Дүллүкүтүгэр элбэх оҕолоох аатырбыт булчут Николай Руфович Руфов дьиэ кэргэнигэр төрөөбүтэ. Төрөппүттэрэ сүөһү-сылгы ииттэр буоланнар Руф уонна бырааттара кыра эрдэхтэриттэн от-мас үлэтигэр эриллэн улааппыттара. Аҕалара күөлгэ, өрүскэ, ойуурга дэгиттэр булчут буолан оҕолор сибиэһэй булду күннэтэ аһыыллара. Манна үрүҥ аһы эбэн кээс, онон да буолуо оҕолор уоллуун-кыыстыын бары саханы ортону үрдүнэн үлэлээх-хамнастаах, көрүҥнээх дьон буолбуттара. Совхоз баарын саҕана аҕаларын кытта бултууллара, онтон сэбиэскэй тутул ыһыллыбытын кэннэ сүөһү-сылгы ииттэн, ону таһынан бултанан быр-бааччы олороллор. Дүллүкүгэ баар үс уол элбэх сылгы, сүөһү баайдаахтар, үлэни-хамнаһы кыайа-хото туталлар. Улахан уол Руф оскуола кэнниттэн 1-2 сыл үлэлээт, армияҕа баран Чуумпу акыйааҥҥа сулууспалаабыта. Байыаннай Муоратааҕы Флотка кини 1972-1975 сс. сулууспалаабыта, сулууспа туйгуна буолбута. 1976-1978 сс. үп техникумугар үөрэнэр уонна Орто-Халымаҕа үлэҕэ ананан барар, онтон бэттэх Халымаҕа олохсуйан олорор, үлэлиир.

         Руф сахаҕа бөдөҥ киһи, эдэр эрдэҕиттэн мас тардыһыытынан уонна гиирэ анньыытынан дьарыктанар этэ. Сотору буолаат наар гиирэҕэ көһөр уонна Манчаары VIII Спартакиадатыгар 1981 с. I м, XI оонньууларга III м ылар. Саха АССР чемпионатыгар 1980 с. I м ылар. Саха АССР гиирэҕэ спордун маастара буолар. IX, X сайыҥҥы Спартакиадаларга I м, II м ылар, “Урожай” общество уобаластааҕы Сэбиэтигэр 1982, 1983, 1984 сс. чемпион буолар,1986 с. II м ылар. Онон Руф Руфов Саха сиригэр 1981-1986 сс. ыарахан ыйааһыҥҥа тарбахха баттанар биир күүстээх гиревик быһыытынан биллэр. Руф чөл олоҕу тутуһар буолан билигин да чэгиэн, үлэтиттэн ордор бириэмэҕэ куска-хааска үчүгэйдик бултанар, күһүн, кыһын Халыма күндү балыгын бултанар.

         Дүллүкү дьоно, Руф бэйэтин саастыылаахтара, уол эдэригэр оскуоланы бүтэрээт дойдутугар күһүҥҥү тииҥ булдугар 45-50 тииҥи биир күн бултуурун, 5-4 көстөөх сиринэн тэлэһийэн сылдьарын, ону таһынан тииҥи үксүн үчүгэй хаачыстыбалаахтык ытарын туһунан мэлдьи кэпсииллэр.

         Руф Николаевич бу кэмҥэ 64 сааһыгар сылдьар, ол эрэн таһаарыылаахтык үлэлии-хамсыы сылдьар, үлэтигэр элбэхтик хайҕанар. Ол курдук кини Орто-Халыма оройуонун сэбиэтин грамотатынан, СР Правительствотын, СР Үбүн Министерствотын грамоталарынан, маны таһынан быыбар киин комиссиятын, Дальневосточнай Федеральнай округ бэрэстэбиитэлин, СР Президенин Махтал суруктарынан наҕараадаламмыта. Гиирэ спордун таһынан хапсаҕайга тустара. Бу көрүҥҥэ да Орто-Халымаҕа уонна хотугу зонаҕа биир бастыҥ көрдөрүүлээх бөҕөс. Руф Николаевич үс оҕолоох, олор бары үөрэхтээх үлэһит дьон, Дьокуускай куоракка олороллор. Руф кэтит түөһүн Саха АССР спордун маастара, Саха АССР спордун ветерана, “Саха Республикатыгар физическай культура уонна спорду сайыннарыыга үтүөлэрин иһин” бэлиэлэр киэргэтэллэр.