Михаил Афанасьевич 1995 с. Үөһээ Бүлүү нэһилиэгэр атырдьах ыйын 10 к. төрөөбүтэ.

Михаил Үөһээ Бүлүүтээҕи республиканскай гимназияны 2013 с. бүтэрбитэ, билигин ХИФУ-га хайа институтугар ситиһиилээхтик үөрэнэ сылдьар. Учуутала Сардаана Петровна Захарова омук тылын үөрэтэрин таһынан “Тоҥуочаан” туристическай кружогу иилээн-саҕалаан ыыппыта. Икки сайыны быһа бииргэ үөрэммит оҕолорбун кытта, атын да дойдуттан сылдьар оҕолору кытта билсиһэн, Сардаана Петровна салайааччылаах Сиинэ, Өлүөнэ, Амма очуостарыгар сылдьыбыт кэмнэрэ оскуолатааҕы саамай үтүө, сырдык өйдөбүлү хаалларбыттара. Туристыы сылдьан араас ыарахан ситуациялары туораабыт  уопута билиҥҥи олоҕор олус көмөлөһөр. Туохтан да толлубакка,  иннин диэки баран иһэриттэн, үчүгэй, сатабыллаах салайааччытыгар Сардаана Петровнаҕа махтала улахан.

2017 с. ыам ыйын 23-24 күннэригэр Крым Республикатын Алушта куоратыгар Россия гиирэ спордугар уочараттаах Кубога буолан ааста. Саха сириттэн Василий Дьячковскай салалтатынан 5 спортсмен кыттыыны ылбыта.

Россияҕа, Аан дойдуга аата биллэн эрэр биһиги Миша Саввиновпыт быйылгы ситиһиилэрэ элбэх, ол курдук Саха сирин муҥутуур кыайыылааҕа, Азиатскай зонаҕа 6-с,  Россия ыччаттарга түһүлгэтигэр 4-с миэстэлээх. Бу күрэхтэр рейтиннэринэн Аан дойду Кубогын сериятыгар Латвияҕа чемпион, ити Кубок салгыытын сериятыгар биир ыйааһын үөһэ тахсан үрүҥ көмүс призера буолбута. Россиятааҕы турнирга иккис, Россия кубогар улахан дьоҥҥо бэһис, Россия кубогар ыччаттарга иккис миэстэлээх. Бу ситиһиилэринэн биһиги уолбут алтынньы 24-30 күннэригэр Аан дойду чемпионатыгар Казахстаҥҥа ыччаттарга 68 кг улуу Россия чиэһин көмүскүүр үрдүк чиэскэ тигистэ! Маннык улахан ситиһии сахаларга гиирэ спордугар аан бастакынан кэллэ диэн бэлиэтиэххэ наада. Аан дойду түһүлгэтиттэн түөһүгэр мэтээллээх кэллэҕинэ — улахан бэлэх буолуоҕа.

— Василий Николаевич, бастатан туран, кыайыыгытынан эҕэрдэлиибин. Казахстаҥҥа буолаары турар чемпионакка бэлэмҥит хайдаҕый?

—                Михаил киһи быһыытынан чиэһинэйэ, көнөтө, спортсмеҥҥа бэриллэр бастыҥ хаачыстыбата барыта киниэхэ баар. Олус ылсан дьарыктанар. Эппитин толорон, толотторон баран тэйэр кытаанах характердаах киһи. Бу өрүтэ спортивнай олоҕор улахан көмө буолуоҕа. Дьулуурдаах, кыайтарарын олох сөбүлээбэт, спорт диэн баран муннукка ытаабыт киһи диэн кинини этиэххэ сөп.