Николай Тарасович Тарасов Үөһээ-Бүлүү Дүллүкү нэһилиэгэр 1954 с. тохсунньу ый 18 күнүгэр колхозтаах дьиэ кэргэҥҥэ төрөөбүтэ. Аҕата дьоҥҥо-сэргэҕэ «Уус Тараас» диэн аатынан биллибит киһи этэ. Дүллүкү нэһилиэгэ оччоттон элбэх техникалаах, бурдук, хортуоска, оҕуруот аһа олордор дойду этэ, онон элбэх уус, тимир үлэтэ баар дойдута.

 Николай 1971 с. Дүллүкү 8-с кылаастаах оскуолатын үөрэнэн бүтэрэн Дүллүкү отделениетыгар рабочайдыыр. Ити дьыл Ньурба Маарыгар автослесарь үөрэҕэр үөрэнэн идэ ылар, онтон Дүллүкүгэ кэлэн идэтинэн 1973 сылга дылы үлэлиир. Оскуолаҕа үөрэнэр кэмигэр Дүллүкү оскуолатыгар Е.С. Прокопьев, Г.Г. Хабытчаров физкультура учууталынан үлэлииллэрэ уонна оҕолору спорт араас көрүҥнэригэр дьарыктыыллара. Николай бу учууталларга тустууга, сүүрүүгэ эрчиллэн үөрэнэр оскуолатын чиэһин көмүскүүрэ. Совхозка үлэлии сылдьан Советскай Армия кэккэтигэр сулууспалыы барар, бу кэмҥэ гиирэ анньыытынан кыра кыралаан бэйэтэ дьарыктанар, армия кэнниттэн дойдутугар кэлэн дьэ утумнаахтык дьарыктанар уонна 1978 сылтан 1990 сылга дылы улууһун чиэһин ситиһиилээхтик көмүскүүр. Маҥнай куоталаһар кэмигэр Бүлүү зонатыгар миэстэлэһэр, оройуонугар бастыыр, көрдөрүүтэ сыыйа үрдүүр. Үлэлиир тэрилтэтэ баһаарынай чаас, ол кэмҥэ Ис дьыала отделыгар бас бэринэрэ. Бу кэмҥэ Ис дьыала отделыгар спортка сыһыан үчүгэйэ, элбэх биллиилээх  спортсменнар Д. Кривошапкин, А. Кардашевскай, Н. Григорьев, Н. Заболоцкай, бырааттыы Софроновтар буолан үлэлииллэрэ, онон көхтөөх эрчиллии барара.

         Н. Тарасов 1980 сылтан күүстээх дьарыгы баран спорт маастарын нуорматыгар чугасаһар көрдөрүүлэммитэ, онон дьарыгын өссө эбэн биэрбитэ. 1983 с. Мэҥэ-Хаҥаласка тиийэн «Урожай» ДСО куоталаһыытыгар III м. ылар уонна Саха АССР, РСФСР спордун маастарын нуорматын толорор. 1984 с. “Урожайга” II ылар, Үөһээ Бүлүү хамаандата III м тахсар. Николай 1987 с. Манчаары Спартакиадатыгар V м, 1988 с. тыа сирин оонньууларыгар IV м  ылаттыыр. Бу кэмҥэ Николай Тарасовы кытта Үөһээ-Бүлүүгэ Н. Заболоцкай, Ан. Унаров, П. Алексеев, Ан. Васильев, С. Спиридонов, Н. Кардашевскай дьарыктаналлара уонна улуус чиэһин ситиһиилээхтик көмүскүүллэрэ. 

Николай Тарасович билигин Дьокуускай куоракка бочуоттаах сынньалаҥҥа олорор, эдэр сааһыгар дойдутугар баһаары утары үлэлиир тэрилтэ байыаһыттан саҕалаан баран чаас салайааччытыгар тиийэ үлэлээбитэ. Николай 1984 с. кэтэхтэн үөрэнэн Иркутскай куоракка пожарнай техническай училищены бүтэрбитэ.

Николай Тарасович спортка, үлэҕэ ситиһиилэрин кини элбэх наҕараадалара туоһулууллар.