Эдэр эрдэҕиттэн салайар дьоҕурдааҕа биллибитэ

         Уларов Анатолий Васильевич 1952 с. Харбалаахха Тоҥуулаах түбэтигэр төрөөбүтэ. Толя начальнай оскуоланы Харбалаах оскуолатыгар 1964 с. бүтэрэн баран И. Барахов аатынан оскуолаҕа салгыы үөрэммитэ. Кини оскуолаҕа үөрэнэр кэмигэр көҥүл тустуунан, хапсаҕайынан, гиирэнэн дьарыктаммыта. 1968 с. Минпрос линиятынан көҥүл тустууга оҕолорго республика чемпионата буолбута. Хамаанданы В.А. Бырдакаров салайан илдьэ сылдьыбыта. Хамаандаҕа 10 уол баара, олортон икки Харбалаах уолаттара бэрткэ тустубуттара. Толя 52 кг ыйааһыннаахтарга А. Седалищев (Чурапчы) кэнниттэн II м ылбыта, Петя Николаев III м ылбыта. Оройуон хамаандатын уолаттара бэрткэ тустубуттара эрээри, ыарахан ыйааһыннарга тустар оҕолор суох буоланнар түмүккэ ортоку эрэ буолбуттара. Толя оскуоланы бүтэриэр дылы дьонугар сайынын оттоһоро, сэниэлээх, сүрэхтээх буолан илиинэн оту бэрткэ охсоро. Толя аҕата Прокопий Константинович Александров кыра уҥуохтаах, бэйэтигэр сөп эттээх-сииннээх, кэтит сарыннаах үлэни өрө туппут киһи эбитэ үһү, ааттаах хапсаҕайдьыт, ордук атаҕынан тэбэрэ, олуйара, өссө Хоро нэһилиэгэр ыытыллыбыт “Хапсаҕай сулустара” диэн ааттаах ветераннар тустууларыгар 1989-1990 сс. Борокуоппай бүтэһигин тустан бириистээх миэстэлэммитэ. Сааһа ол кэмҥэ 50-тан лаппа тахсыбыт буолуон сөп, көхтөөх баҕайытык, бултаһан тустан утарсааччыларын барыларын хоппута. Ол иһин да буолуо уолаттара бары тустууктар — Аркадий ССРС үс тустууга маастара, Прокопий СР, ССРС икки тустууга маастара, Петр СР, ССРС, РФ спордун маастара, сиэнэ Ньургун РФ норуоттар икки ардыларынааҕы кылаастаах маастара буолла. Онон Анатолий бырааттара удьуордарыгар сэниэлээх-тэтиэнэх дьонноох буоланнар уонна убайдара бырааттарын Чурапчынан, Намынан тустууга ыыталаан итинник ситиһиилэммиттэрэ.

         Анатолий орто оскуоланы үчүгэйдик үөрэнэн бүтэрэн баран Новосибирскай куоракка тутуу институтугар үөрэнэн тутуу инженерэ идэлэммитэ, Чурапчыга, Намҥа идэтинэн үлэлээбитэ. Онтон партия райкомун ыҥырыытынан Үөһээ Бүлүүгэ кэлэн МСО-ҕа инженеринэн, салгыы тэрилтэ начальнигынан таһаарыылаахтык үлэлээбитэ. Анатолий Васильевич үлэлиир кэмигэр МСО базата биллэрдик бөҕөргөөбүтэ, рабочайдарга саҥа сыһыан олохтоммута. Анатолий Уларов үлэтиттэн быыс буллар эрэ спордунан дьарыгын бырахпакка эрчиллэрэ, күрэхтэһиилэргэ кыттара. Ордук гиирэ анньыытыгар күүскэ ылсыбыта, оройуон, Бүлүү зонатын бастыҥа этэ, 1-кы спортивнай разряды толорбута, спорт маастара буоларга үлэлэспитэ эрээри, аны райком салалтата “Үөһээ Бүлүү” совхозка директорынан анаабыта. Тыа хаһаайыстыбата оччолорго да, билигин да түбүктээх үлэ, онон совхоз директорын быһыытынан элбэх үлэни тэрийбитэ. Совхоз киин уһаайбата Хоро бөһүөлэгэ тупсарын туһугар күүскэ үлэлээбитэ, уулуссалары оҥотторбута, тэрилтэлэр дьиэлэрин туттарбыта, гараж, мастерской объектарын аныгылыы, тупсаҕай буолалларын ситиспитэ. Онтон эмиэ райком салалтата эдэр коммуниһы партия райкомун II-с сэкэритээринэн 31 саастааҕар талаллар. Бу үлэлиир кэмигэр төрөөбүт Харбалааҕар кулууп туттараран биир дойдулаахтарын махталларын ылар.

         Анатолий Васильевич хайа да үлэҕэ үлэлээтэр, норуот ортотугар, ыччат ортотугар сылдьара, чөл олоххо, спортка уһуйара, культурнай сынньалаҥы табыгастаахтык тэрийэрэ.

         Анатолий Васильевич олоҕун тиһэх кэмигэр Дьокуускайга “Мамонт” фирмаҕа үлэлээбитэ. Күөгэйэр күнүгэр сылдьан бастыҥ гиревик, спорду өрө тутааччы, кэскиллээх салайааччы ыар ыарыыттан күн сириттэн суох буолбута. Кини олоҕун икки кыыһа, сиэннэрэ салгыыллар уонна Дьокуускай куоракка дьоһун ыал буолан олороллор, үлэлииллэр.