Егор Герасимович 1944 с. муус устар 15 күнүгэр Быракаан нэһилиэгин Дьааргын диэн сиригэр күн сирин көрбүтэ. Ийэтэ атыыһытынан, кэлин фермаҕа Илин Ырайынан, Кээҥкирэнэн үүт астааччынан үлэлээбитэ, Сталин төбөлөөх мэтээллээх тыыл ветерана. Өр бириэмэҕэ сүрэҕинэн ыалдьан 1975 с. олохтон туораабыта.

1951 с. Быракаан начаалынай оскуолатыгар нулевой кылааска үөрэнэ киирбитэ. Онтон салгыы Тойоку 7 кылаастаах оскуолатыгар, Үөһээ Бүлүүгэ Исидор Барахов оскуолатыгар үөрэнэн орто үөрэхтэммитэ.

1965 с. оскуоланы бүтэрэригэр “тракторист-машинист III класса” диэн правалаах бүтэрбитэ, аармыйаҕа Тихоокеанскай Флокка 4 сыл кэриҥэ сулууспалаабыта. Сулууспа кэнниттэн 1969 с. совхозка киирэн тракториһынан 1996 с. ыһыллыы-тоҕуллуу буолуор диэри үлэлээбитэ, 1997 с. пенсияҕа үлэтэ суоҕунан сибээстээн эрдэ тахсыбыта, билигин кэтэх сылгы иитиитинэн дьарыктанар.

Егор Герасимович эдэр эрдэҕинэ спордунан дьарыктанан, мас тардыһыытыгар оройуоҥҥа миэстэлэһэрэ, сүүрүүгэ оройуоҥҥа бастаан республикаҕа тиийэн уон киһи иһигэр киирэ сылдьыбыта, сааһыран ветеран буолан баран ыһыахха оройуоҥҥа тустууга иккис буолбута. 1984-1999 сс. дылы саамай дьаныһан туран гиирэ спордунан дьарыктаммыта, улууска 1986 с. миэстэлэһэн, кэнники биэс сылга маҥнайгы миэстэттэн түспэккэ эрэ 55 сааһыгар спортан туораабыта, кини холобуругар үөрэнэн улууска бастыҥ гиревиктэр үөрэнэн, тыыллан-хабыллан таҕыстылар.