Алексей Иванов 1991 с. Үөһээ Бүлүү Далырыгар төрөөбүтэ.

Алексей 2009 с. Үөһээ Бүлүүтээҕи М.А. Алексеев аатынан республиканскай гимназияны, 2013 с. ХИФУ геолого-разведочнай факультетын ситиһиилээхтик үөрэнэн бүтэртээбитэ. Билигин “Сахатранснефтегаз” тэрилтэҕэ идэтинэн үлэлии сылдьар.

Алексей спордунан университетка үөрэнэр сылларыгар күүскэ дьарыктаммыта. Кини эт-хаан өттүнэн эргиччи сайдыылаах буолан университет студеннарыгар эт-хаан өттүнэн сайдыылаах буоларга (общефизическая подготовка) ыытыллар күрэхтэһиини биэс төгүл кыайан бэйэтин кыаҕар, күүһүгэр-уоҕугар, сымсатыгар лаппа эрэнэр буолбута уонна республика араас турнирдарыгар, Дыгын оонньууларыгар кыттыытын саҕалаабыта.

Илиитигэр-атаҕар күүстээх, сымса, сынтарыйбат дьулуурдаах уолу биллиилээх тренер Любомир Владимирович Николаев таба көрөн дьарыктаан барбыта. Ситиһиилэр өр күүттэрбэтэхтэрэ, 2013 с. Мэҥэ-Хаҥалас Төҥүлүтүгэр Күүстээх Дэһээккин бирииһигэр ыытыллыбыт сахалыы пятиборьеҕа 70 кг дылы ыйааһыннаахтарга абсолютнай чемпион үрдүк аатын ылбыта, 2013 с. Туймаада ыһыаҕар ыытыллыбыт Дыгын оонньууларыгар бэһис миэстэҕэ тахсыбыта. Алексей 2015 с. Хаҥалас улууһун Чкаловыгар Күүстээх Бөтүү бирииһигэр 70 кг дылы ыйааһыннаахтарга абсолютнай чемпион буолбута, бу сыл ыччат республикатааҕы ыһыаҕар многоборьеҕа иккис миэстэни эрэллээхтик ылбыта.

Алексей быйыл Дыгын оонньууларыгар кыттар быраабы ылар иһин республика бэртэрин кытта иэмэх талах курдук эрийсэн бэһис миэстэҕэ тахсыбыта.

Быйыл ыытыллар Дыгын оонньууларыгар уолбутугар ситиһиини баҕарыаҕыҥ!