Николаев Л.В. 1983 с. Үөһээ Бүлүү улууһун Нам нэһилиэгэр төрөөбүтэ.

Любомир 2001 с. М.А. Алексеев аатынан Үөһээ Бүлүүтээҕи республиканскай гимназияны, 2006 с. М.К. Аммосов аатынан Саха государственнай университетын ситиһиилээхтик үөрэнэн бүтэртээбитэ.

Любомир оскуолаҕа үөрэнэр сылларыттан спордунан утумнаахтык дьарыктаммыта. Биллиилээх тренер Г.А. Николаевка эрчиллэн орто дистанцияларга сүүрүүгэ үөрэнээччилэр кыһыҥҥы, сайыҥҥы күрэхтэһиилэригэр республикаҕа элбэхтик бастаабыта, призердаабыта. Республика үөрэнээччилэрин сүүмэрдэммит хамаандатын састаабыгар киирсэн Сибиир уонна Уһук Илин регионугар эмиэ элбэхтик чемпионнаабыта уонна призердаабыта.

Любомир университетка үөрэнэ сылдьан мас тардыһыытынан уонна хапсаҕайынан дьарыктаммыта. Бу көрүҥнэргэ 2011 с. аатырбыт хапсаҕайдьыт, республика элбэх төгүллээх абсолютнай чемпиона В.Н. Ефремов 80 сылыгар анаммыт уонна биллиилээх мас тардыһааччы Ф. Дягтеревка анаммыт республиканскай турнирдар абсолютнай кыайыылаахтарынан буолбута, Саха Республикатын спордун маастарын ааттарын ылаттаабыта. Ол эрэн Любомир Николаевич элбэх көрүҥтэн турар “Дыгын оонньууларыгар” кыттан үрдүк ситиһиилэрдээх. Кини маҥнай национальнай илии-атах оонньууларыгар 2008 с. “Хоро уола-2008” күрэҕи кыайан абсолютнай чемпион буолбута, 2010, 2011, 2012 сс. “Дыгын оонньууларыгар” үһүс миэстэлэри ылбыта.

  Любомир Николаевичка спортивнай олоҕор 2013 с. сулустаах сылынан буолбута, ол курдук кини “Дыгын оонньууларын” кыайбыта, Манчаары Спартакиадатыгар сахалыы спорт көрүҥнэрин күрэхтэһиитигэр иккис миэстэни ылбыта. Салгыы кини 2014 с. “Дыгын оонньууларыгар” иккис миэстэҕэ тахсыбыта, “Тоҕус томтор оонньууларын” кыайбыта, бу күрэхтэһиигэ 2016 с. иккис миэстэни ылары ситиспитэ.

Любомир Николаевич бу сүдү улахан эрийсиилээх, күүс-уох баранар, эт-сиин эстэр,  уол оҕо уйана-хатана биллэр турнирдарыгар кыайталаан иккитэ УАЗ легковойунан, Лада-Карина массыынанан, омук мотоциклынан, квадроциклынан наҕараадаламмыта, билигин да эрчиллиитин бырахпат, онон кини аатын улахан турнирдарга өссө да истиэхпит диэн эрэнэбит.

Любомир Николаевич Ис дьыала отделын сотруднигынан үтүө суобастаахтык үлэлии сылдьар, кэргэннээх, түөрт оҕолоох.