Степан Руфов Николай Руфович Руфов орто уола. Кини Дүллүкүгэ 1969 с. алтынньы 3 к. төрөөбүтэ. Элбэх оҕолоох, сүөһүлээх-сылгылаах дьоҥҥо төрөөн үлэҕэ-хамнаска бэрт кыратыттан эриллэн улааппыта. Онон тыа үлэтин барытын үлэлээбит киһи, оҕо эрдэҕиттэн убайдарын, бырааттарын кытта от бөҕөнү оттоон буспут-хаппыт киһи. Эрдэ ыал буолан уонна умсулҕаннаах, уол оҕону угуйа-ыҥыра турар бултааһын барахсаҥҥа аралдьыйбыта. Онон оҕо эрдэҕиттэн ону таһынан ийэ-аҕа өттүнэн удьуордаан бэйэтин кыанар, күүстээх-уохтаах, бөҕө киһи буола улааппыта. Ол эрэн Дүллүкүгэ кинини анаан-минээн эрчийэр тренер суоҕа, онон маассабай спорт көрүҥнэринэн эрэ дьарыктаммыта. Үчүгэйдик волейболлуура, атах оонньуура уонна орто дистанцияларга сүүрэрэ. Оскуоланы бүтэрэн баран сотору Дүллүкү кыыһын Евдокияны кытта холбоһон ыал буолаллар, туспа сүөһү-сылгы ииттэн, оттоон-мастаан, дьиэ-уот туттан олороллор. 1997 с. Ньурбаҕа ыытыллыбыт Олоҥхо оонньууларыгар сахалыы многоборье аан маҥнай программаҕа көрүҥ быһыытынан киллэриллэр. Бу күрэхтэһии сана, сонун этэ, ол эрэн саха бэртэрэ мустаннар күргүөмнээх күрэхтэһии тэриллэр. Бу күрэхтэһиигэ Үөһээ Бүлүү улууһуттан кыттар, урут бу көрүҥҥэ күрэхтэспит бэлэмнээх киһи суоҕа, многоборье элбэх эрчиллиини, утумнаах дьарыгы эрэйэр көрүҥ. Манна дьиэ спорт салалтатыгар кими кытыннарарга сүбэлэһии буолар уонна спорт салайааччыта  Павел Гаврильев Дүллүкүгэ олорор баар бөҕө-таҕа, кыахтаах Степан Руфовы кэпсэтэн Ньурбаҕа илдьэ барар. Бириэмэтэ ыгым буолан улахан эрчиллии суоҕа, көрүҥнэрин, быраабылатын билсэн, кыратык эрчиллэн баран Степан Ньурбаҕа тиийэр. Манна куоталаһан отучча киһиттэн II м ылар. Ити кини 28 саастааҕар этэ. Ол эрэн Степан тоҕо эрэ салгыы дьарыктанан бу көрүҥҥэ кыттыбатаҕа. Ол оннугар улууска тэриллэр гиирэ, мас тардыытын курдук көрүҥнэргэ куоталаһар, бириистээх миэстэттэн түспэт. Өссө саҥардыы 40 сааһын лаппа ааһан баран биир ыһыахха нэһилиэктэр икки ардыларынааҕы куоталаһыыга 1500 м сүүрүүгэ эдэр уолаттары кытта куоталаһан II м ылбыта. Онтон атах оонньуутугар нэһилиэгин ыһыахтарыгар, улуус ыһыаҕар куруук инники күөҥҥэ сылдьар,  Михаил Ан бирииһигэр эмиэ бастаталыыр. Онон Степан биһиги санаабытыгар сөптөөх тренергэ түбэһэн эрчиллибитэ уонна чопчу биир көрүҥүнэн дьарыктаммыта буоллар ситиһиитэ быдан үрдүк буолуо хааллаҕа. Степан өр сылларга булчутунан үлэлээбитэ, онно үксүн булдун тэрилин тиэнэн баран салаасканан сылдьан бултуура. Онон чахчы кыанар киһитэ биллэр. Куйуурга мууһу алларыыга биир бастыҥ анньыыһыт, муус анньыытыгар куоталаһан I-II м өрүү ылар, толору кумахтаах куулу көтөҕүү тэрилиннэҕинэ эмиэ бастыыр.

         Степан билигин төһө да 48 саастааҕын иһин ветераннарга спорт хас да көрүҥэр куоталаһар, Бүлүү сүнньүн нэһилиэктэрин куоталаһыыларыгар көхтөөхтүк кыттар. Икки  сыллааҕыта МЧС тэрилтэтигэр үлэҕэ киирээри норматив туттарыытыгар кэлэр, онно хас да эдэр 20-25 саастаах уолаттар норматив туттарбыттарыгар уонна биирдиилээн куоталаспыттарыгар Степан нормативы да тулуппатаҕа, уолаттары да киһилэтэлээбэтэҕэ уонна үлэҕэ быһа ылыллыбыта. Дьэ ити курдук Дүллүкү нэһилиэгин биир бөҕө-таҕа, сытыы-сымса киһитэ дойдутугар үлэлии-хамсыы, эдэрдэри спорт араас көрүҥнэригэр уһуйа сылдьар. Кини бииргэ төрөөбүт быраатын уолаттара Михаил, Николай Руфовтар абаҕаларыттан үөрэммиттэрэ-уһуллубуттара балай да баар буолуон сөп.