Артур Арсентьевич 1972 с. Үөһээ Бүлүү оройуонугар Өргүөт нэһилиэгэр хапсаҕайга Саха АССР спордун маастара Арсентий Семенович Оконосов дьиэ кэргэнигэр төрөөбүтэ. Артур төрүттэрин батан бөдөҥ-садаҥ, күүстээх-уохтаах буола улааппыта. Бэрт кыра сааһыттан аҕатын Арсентий Семеновиһы, республика чемпион от охсооччутун батыһа сылдьан от охсо үөрэммитэ, дьаныардаах, дьулуурдаах, тулуурдаах буоларга иитиллибитэ. Артур маннык күүстээх үлэнэн иитиллибитэ кэлин спордунан утумнаахтык дьарыктанарыгар туһалаабыта саарбаҕа суох. Артур Арсентьевич маҥнай боксанан, онтон кикбоксинынан күүскэ дьарыктаммыта, республика, Уһук Илиҥҥи региоҥҥа, тутулуга суох судаарыстыбалар түмсүүлэрин (СНГ), Азия континенын күрэхтэһиилэригэр ситиһиилээхтик кыттыбыта. Кикбоксиҥҥа Россия спордун маастара, бокса маастарыгар кандидат.

         Артур Арсентьевич 1993 с. биллиилээх боксердар В. Васильев, Андреев бириистэригэр анаммыт республиканскай турнирдарга II, III миэстэлэри ылбыта, республика чемпионатыгар призердаабыта.

         Артур Арсентьевич ордук кикбоксиҥҥа чаҕылхай кыайыылардаах. Ол курдук 1993 с. кикбоксиҥҥа республика чемпионатыгар II призер буолбута, ити сыл тутулуга суох судаарыстыбалар түмсүүлэрин (СНГ) чемпионатыгар II миэстэ ылбыта, Азия чемпионатыгар III миэстэҕэ тахсыбыта.

         Артур Арсентьевич дьон киэнэ чулуута күрэхтэһэр 75 кг ыйааһыннаахтарга киирсэр. Кинини Саха сирин биллиилээх тренерэ Вильям Иванов эрчийэр. Артур Арсентьевич Дьокуускай куоракка дьиэ кэргэнинээн олорор, үлэлиир, оҕолорун иитэр.