1951 с. Маҥаас нэһилиэгэр төрөөбүтэ. Маҥаас 7 кылаастаах, Боотулуу орто оскуолатын үөрэнэн бүтэрбитэ. Луцк куоракка Украинаҕа физкультурнай  институту үөрэнэн бүтэрбитэ. Оҕо сылдьан кыра ыйааһыҥҥа оройуон көҥүл тустууга, хапсаҕайга бастыыра. Онтон үөрэнэ сылдьан Украинаҕа үс тустуунан тэҥҥэ дьарыктаммыта, көҥүл тустууга, классическай тустууга, самбо тустууга ССРС спордун маастарыгар кандидат буолбута. Ордук көҥүл тустууга сыстаҕас курдуга да, үһүөннэригэр тустара арааһа ол алҕаһа буолуон сөп, биир тустууну чорботон дьарыктаммыта буоллар ССРС спордун маастара буолуо хааллаҕа. Элбэхтик күрэхтэһэн Украина спортивнай обществоларыгар кыттара, миэстэлэһэрэ. Ол эрэн спорт маастарын нуорматын толорботоҕо. Үөрэҕин кэнниттэн Далыр, Кырыкый, Маҥаас оскуолаларыгар физруктаабыта уонна уолаттары тустууга эрчийбитэ. Ордук Маҥааска табыллан үлэлээбитэ, элбэх уолу тустууга дьарыктаан оҕолор ортолоругар үчүгэйдик тустар уолаттар баар буолбуттара. Иван Иннокентьевич өр сылларга үтүө суобастаахтык үлэлээн Саха Республикатын норуотун үөрэҕириитин туйгуна ааты сүкпүтэ. Элбэх Махтал суруктар, Бочуотунай грамоталар ону туоһулууллар.