Семен Данилович Егоров оҕо сылдьан хапсаҕайынан, онтон Бүлүүгэ тиийэн көҥүл тустуунан, онтон Москва куоракка тиийэн классическай тустуунан дьарыктанар. Бу тустууларга тахсыылаахтык, дьоһуннаахтык тустуталыыр. Ол курдук 1961 с. “Урожай” ДСО обществотыгар III м ылар, онтон Москва куоракка үөрэххэ барар, 1962 с. “Урожай” общество Киин Сэбиэтигэр классическай тустууга III м ылар. “Урожай”, “Спартак”, онтон да атын спортивнай обществолар Киин Сэбиэттэригэр, ол эбэтэр, ССРС-ка үс миэстэ  иһигэр киирдэххинэ ССРС спордун маастара буолаҕын. Ону Семен үрдүттэн Москваҕа үөрэнэ сылдьан толоруон сөптөөх этэ да, олорор сиригэр табыллыбакка Москваттан Иркутскай куоракка көһөн кэлэр. Тренердэрэ уларыйаллар, оччотооҕу тыа оҕото ити маастар аатын ылыахтааҕын ирдэспэт, онон хаалар маастарын аатын ылбакка хаалар. Иркутскайга кэлэн аны көҥүл тустуунан дьарыктанар уонна маҥнай куорат чемпиона, сотору буолаат уобалас чемпиона буолар. 1963 с. Ленинград куоракка маастар нуормалаах куорат чемпионатыгар баран кыттар уонна 4 м ылар. ССРС спордун маастарын нуормата Москва, Ленинград куораттарга үс иһигэр киирдэххинэ туолар, онон Семен кыл-мүччү толорбот. Ити курдук кини активнай тустуута бүтэр. Үөрэҕин бүтэрэн дойдутугар кэлэн  өр сылларга Бүлүүгэ үлэлиир. Ол быыһыгар Үөһээ Бүлүүгэ Өргүөт оскуолатыгар үлэлиир. Үөһээ Бүлүүгэ үлэлии сылдьан оройуон чемпиона буолар, Бүлүү зонатыгар бастыыр, 3 төгүл Бүлүү улууһун көҥүл тустууга кыайыылааҕа буолар. 1979 с. ветеран бөҕөстөр ортолоругар Бүлүү зонатын Спартакиадатын хапсаҕайга чемпиона буолар. Бүлүүгэ үлэлии сылдьан улуус хамаандатын күрэхтэһиигэ бэлэмниир, көмөлөһөр,  хамаанданы үчүгэйдик бэлэмнээбитин иһин “Урожай” уобаластааҕы комитетын Бочуотунай грамотатынан наҕараадаланар

         Семен Данилович Егоров 1936 с. Кырыкый нэһилиэгэр төрөөбүтэ уонна сотору дьоно Бүлүү куоратыгар көспүттэрэ, оччолорго массыына суола суоҕуна Кырыкыйдар Бүлүү куоратыгар элбэхтик быһа атынан сылдьыһаллара, быһа бардахха 5-6 эрэ көс, онон кырыкыйдар Бүлүүгэ көһүүлэрэ элбэх этэ. Семен Данилович үлэ ветерана, Россия спордун ветерана, СР спордун ветерана, “Бүлүү куоратыгар үтүөлэрин иһин” знак кавалера, көҥүл тустуу сайдыытыгар үтүөлэрин иһин СР “Тустуу сайдыытын 50 сылыгар” бэлиэнэн, 2006 с. “Саха сиригэр спорт сайдыыта 90 сыла” бэлиэнэн, “Сэрии оҕолоро” бэлиэнэн наҕараадаламмыта.

         Бу кэмҥэ спорт, үлэ ветерана Семен Данилович Бүлүү куоратыгар бочуоттаах сынньалаҥҥа олорор. Пенсияҕа тахсан баран тутууга өр сылларга үлэлээбитэ. Ааттаах мас ууһа уонна маһы кыайар тутааччы эбитэ үһү, билигин 80 саастаах кырдьаҕас киһи дьиэтигэр сынньалаҥҥа олорор. Сахатын сиригэр, дойдуга, аан дойдуга туох уларыйыы тахсарын кэтээн көрөр, элбэхтик ааҕар, доруобуйатын көрүнэр.