Александр 1964 с. кулун тутар 4 күнүгэр Үөһээ Бүлүү оройуонун Давыдов учаастагар төрөөбүтэ. Үөһээ Бүлүү И. Барахов аатынан орто оскуолатын үөрэнэн бүтэрбитэ.

Билиҥҥи үйэҕэ историяны сурукка-бичиккэ киллэрэн, суоруллубат гына үйэтитэр буоллубут. Александр Андрей Устинов, Кирилл Никифоров, Гаврил Хабытчаров, Геннадий Николаев курдук дьоннуун алтыһан, доҕордоһон, Александр Васильевтыын бииргэ дьарыктанан орто дистанцияларга сүүрэн, республикаҕа үөрэнээччилэргэ биир биллэр сүүрүк буолбута. Ол кэмҥэ орто дистанцияларга Юрий Сергеев, Кирилл Никифоров, Геннадий Николаев оройуоҥҥа биллэр, чулуу сүүрүктэр бааллара. Кинилэри кытта тэҥҥэ эрчиллэн, сүүрэн, күөттэһиилээх, күрэхтэһиилээх буолан, сүүрэрэ сайдан барбыта. Кинилэр Уһук Илиҥҥэ, Сибииргэ, соҕуруу “Урожай” ДСО линиятынан элбэхтик күрэххэ сылдьаллара, Сахаларын сирин аатын ааттаппыттара. Оччолорго быһа барыллаан, бэйэлэрэ сүрэхтэрэ тугу этэринэн, эттэрэ-сииннэрэ уйарынан эрчиллэллэрэ, ол да буоллар сыһыыттан сылгыланан, хонууттан хомуллан, айылҕа барахсан биэриитинэн спортка тардыллан инники күөҥҥэ сылдьыбыттара.

Сайын оройуон ыһыаҕар оҕолорго бастаабытын кэннэ Александры сборнай хамаандаҕа ылбыттара. Дьиҥнээх эрчиллии диэн хайдаҕын манна билбитэ.

1983  с. Манчаары Спартакиадатыгар 5000 м  сүүрүүгэ иккис миэстэлэммитэ, 1000 м Сардаана Герасимова үһүс, ветераннарга Кирилл Никифоров 3000 м үһүс миэстэлэргэ тикибиттэрэ. Үөһээ Бүлүү хамаандата бэһис буолбута. Александр оскуолаҕа үөрэнэ сылдьан саас  “Үөһээ Бүлүү-Хохочой” маршрутунан 90 км усталаах сүүрүүгэ кыттыбыта. Бу биэс киһилээх уһун сүүрүүнү Геннадий Алексеевич Николаев салайан илдьэ сылдьыбыта. Спортсменнар бары сүүрүүнү чиэстээхтик түмүктээбиттэрэ, сылдьыбыт сирдэрин аайы сүүрүүнү пропагандалаабыттара.

Александр доруобуйатын туругунан эдэр сааһыгар сүүрэрин тохтоппута. Билигин олохтоох телевидение операторынан үлэлиир. Улуустааҕы телевидение коллектива улууһун дьонун-сэргэтин, олоҕун-дьаһаҕын, кыһалҕаларын, ситиһиилэрин ситимин быспакка республиканскай телевидениенан, радионан кэпсии, көрдөрө турар. “Саха” НКИК филиалыгар ”Хотун Бүлүү” филиал айар үлэтинэн инники күөҥҥэ сылдьар. Олоҕун доҕоро Оксана Петровналыын ыал буолан, үс кыыс оҕоломмуттара. Ыал ийэтэ урбаанньыт, “Вилюй” рынокка улэлиир.