Мотя уонна Паша спортивнай дьиэ кэргэҥҥэ төрөөбүт кыргыттар. Ийэлэрэ Раиса Васильевна Үөһээ Бүлүүтээҕи М.Т. Егоров аатынан 2-с №-дээх орто оскуолаҕа физкультура учуутала. Кини оскуолаҕа биатлон уонна сүүрүү курдук спорт ыарахан көрүҥнэригэр дьарыктыыр. Эрчийбит оҕолоро улууска, республикаҕа бастыҥнарынан ааттаналлар. Билигин, бэл диэтэххэ, урут кини үөрэппит, эрчийбит оҕолоро аны бэйэлэрин оҕолорун киниэхэ аҕалаллар. Бу учуутал сыралаах үлэтин үтүө түмүгэ буолар. Үөрэнээччилэригэр үтүө холобур буолардыы, Раиса Васильевна дьиэ кэргэнэ бары спорт араас көрүҥүнэн дьарыктаналлар. Төрдүс оҕо Паша кыратыттан олус сытыы, сымса. Иккис кылаастан саҕалаан араас таһымнаах, бэл, республика күрэхтэһиилэригэр миэстэлэһэр буолбута. Онтон саҕалаан билигин чэпчэки атлетикаҕа СР хас даҕаны төгүллээх чемпиона, призера. Ону ааһа көтөн, Хотугулуу-Илиҥҥи Федеральнай уокурук чемпиона.

Паша 400, 800, 1500 м сөбүлээн сүүрэр. Дьаныардаахтык эрчиллэн, сыл аайы көрдөрүүтүн тупсаран иһэр. 2013 с. Чурапчыга ыытыллыбыт Манчаары Баһылай XIX Спартакиадатыгар хотугу троеборьеҕа боруонса мэтээли ылбыта. Оттон Намҥа буолан ааспыт СР норуоттарын VI спортивнай оонньууларыгар 1500 м боруонса мэтээлгэ тиксэн баран, өссө 800 м эрэллээхтик бастаан, кыһыл көмүс мэтээлинэн наҕараадаламмыта.

Бииргэ төрөөбүт аҕыстыы-балыстар Мотя, Паша Григорьеваларга спортка өссө үрдүк ситиһиилэри, кыайыыны-хотууну баҕарабыт. Оттон элбэх оҕону спортка уһуйбут ийэлэрэ Раиса Васильевнаҕа дьарыктыыр оҕолоро үрдүк чыпчааллары дабайа туралларыгар алгыс тылбытын аныыбыт.