Розалия Гаврильевна 1970 с. Үөһээ Бүлүү улууһун Нам нэһилиэгэр төрөөбүтэ.

Розалия Гаврильевна чэпчэки атлетикаҕа I спортивнай разрядтаах, Үөһээ Бүлүүтээҕи оҕо спортивнай оскуолатыгар тренер Николаев Геннадий Алексеевичка дьарыктаммыта. Онтон ыла Розалия үгүс ситиһиилэммитэ. Аҥардас оҕо спортивнай оскуолатыгар үөрэнэр сылларыгар оҕолорго республика чемпионката уонна призера буолбута. Оскуолаҕа бииргэ үөрэммит оҕолоро бары да спордунан умсугуйан туран дьарыктаналлара. Надя Федотова, Оксана Ульянова, Лена Кононова, Яна Алексеева, Юра, Петя Синнэр оҕолорго республика чемпионнарынан уонна призердарынан буолбуттара.

1987 с. Хабаровскайдааҕы физкультурнай институт студентката буолар. Ити сылга чэпчэки атлетикаҕа XI Манчаары Спартакиадатын 1000 м уонна 1500 м дистанцияларга чемпионката уонна III призера. 1987 с. оройуон 10 бастыҥ спортсменнарын ахсааныгар киирбитэ. 1991 с. Хабаровскайдааҕы физкультурнай институту бүтэрбитэ. Үөһээ Бүлүү улууһун хас да төгүллээх чемпионката, Бүлүү зонатын чемпионката уонна призера, Үөһээ Бүлүү оройуонун чэпчэки атлетикаҕа сүүмэрдэммит хамаандатын чилиэнэ. Билигин Үөһээ Бүлүүтээҕи оҕо дьиэтин иитээччитэ, СР үөрэҕириитин туйгуна. Кэргэннээх, оҕолордоох.