Аркадий Степанович 1950 с. алтынньы ый 21 к. Сунтаар улууһун Элгээйи нэһилиэгэр төрөөбүтэ, Тойбохой детдомугар иитиллибитэ. Оскуолаҕа үөрэнэ сылдьан остуол тенниһинэн дьарыктаммыта. Оскуола кэнниттэн наар илии хара үлэтигэр эриллибитэ. Кэлин ыал буолан, түөрт оҕолонон Үөһээ Бүлүүгэ кэлэн олохсуйбута. Үөһээ Бүлүүгэ кэлэн сүүрүүнэн дьарыктаммыта уонна бэйэтин холобуругар оҕолорун уһуйбута. Ыһыахтарга биир уонна үс биэрэстэлэргэ сырсан бириистээх миэстэлэргэ тиксэрэ. Сааһыран баран бэтэрээн-спортсменнар сүүрүүлэригэр оройуоҥҥа хаста да бастаабыта. Төһө да миэстэлэспэтэр, Манчаары Спартакиадатыгар, тыа сирин спортсменнарын Спартакиадатыгар кыттыталаабыта.

         Республика иһигэр “Дьулуур” кулууп тэрийбит 20 км сүүрүүтүгэр II м; “Кыым” хаһыат 1991 с. Төҥүлүгэ тэрийбит күрэхтэһиитигэр кросска III м, хамаанданан эстафетаҕа III м, сылын аайы ыытыллар Байкалов бирииһигэр 5 км III м, “Эркээни” бирииһигэр III м, Бүлүү бөлөх региональнай сүүрүүгэ III м ылаттаабыта. Ону таһынан хас эмэ хонуктаах уһун сүүрүүлэргэ кыттыбыта. Ол курдук, Дьокуускай – Бүлүү – Дьокуускай маршрутунан сүүрүү кыттыылааҕа.

         Нэһилиэккэ, улууска спорду киэҥник пропагандалааччылартан биирдэстэрэ, Саха АССР спордун маастара уонна СР спордун физическэй культуратын ветерана.