Василий Васильевич 1953 с. ыам ыйын 7 күнүгэр Үөһээ Бүлүү нэһилиэгэр төрөөбүтэ. Аҕата Можуков Василий Васильевич Ньурба Маалыкайыттан төрүттээх, ийэтэ Николаева Варвара Андреевна Үөһээ Бүлүү Боотулуутуттан силис тардар.

 1961 с. Далыр орто оскуолатыгар бастакы кылааска үөрэнэ киирбитэ, маҥнайгы учуутала Иванова Марфа Герасимовна, физкультура учуутала Донской Андрей Иванович (Саха АССР спордун маастара, атах оонньуутугар) этэ.

1972-1974 сс. Магаданскай уобалас Советскай Армияҕа сулууспалаабыта, 1974 с. промкомбинакка столярынан үлэҕэ киирбитэ, 1978 с. “Үөдүгэй” совхоз Карл Маркс отделениетыгар, 1981  с. 2-с нүөмэрдээх (физмат) оскуолаҕа электригынан үлэлээбитэ. 1991 с. М.А. Алексеев аатынан Үөһээ Бүлүүтээҕи республиканскай гимназияҕа охраннигынан, 2008 с. М.А. Алексеев аатынан Үөһээ Бүлүүтээҕи республиканскай лицей-интернакка вахтерынан үлэлээн пенсияҕа тахсыбыта. 2010 с. СР үлэ ветерана буолбута.

Василий 1975 сылтан сүүрүүнэн дьарыктаммыта, оройуон, Бүлүү зонатын күрэхтэһиилэригэр миэстэлэһэрэ.

1995  с. милиция күнүгэр анаммыт сүүрүүгэ Харбалаах-Тамалакаан-Ороһу-Нам-Үөһээ Бүлүү мршрутунун сүүрүүгэ миэстэлэһэр.

1996  с. Олимпийскай оонньуулар 100 сылларыгар аналлаах Үөһээ Бүлүү-Нам-Өргүөт-Быракаан-Туобуйа маршрутунан 300 км сири сүүрэр.

1996 с. Илларион Никифоровка анаммыт Нам-Үөһээ Бүлүү маршрутунан сүүрүүгэ иккис миэстэни ылар.

1997  с. бэс ыйын 27-29 кк.  XV Манчаары Баһылай Спартакиадатыгар ветераннарга 5000 м кыттыбыта.

2006 с. “Дьулуур” кулууп 18-с сүүрүүтүгэр ветераннарга 5000 м бастаабыта, 1999 с.   42 км 195 м дистанцияҕа сүүрэн  СР спордун маастара буолбута.

Василий элбэх республиканскай таһымнаах күрэхтэһиилэргэ ветераннарга оройуонун чиэһин элбэхтик көмүскээбитэ уонна ветераннарга мэлдьи бастыыра, бириистээх миэстэттэн түспэтэҕэ.

1978 с. Александра Васильевнаны кытта ыал буолбута. Биэс оҕолоохтор, биэс сиэннээхтэр.  Үөдүгэй нэһилиэгэр дьиэ туттан, быр-бааччы олохтоох ыаллар. Оҕолор  оскуоланы бүтэрэн, идэ ылан үлэлииллэр, ыал буоллулар, этэҥҥэ олороллор.

Василий Васильевич Үөдүгэй нэһилиэгин бочуоттаах гражданина.