Уһулуччулаах сүүрүк

Саха омук уһулуччулаах сүүрүгэ Наумов Дмитрий Дмитриевич 1982 с. бэс ыйын 5 к. Нам нэһилиэгэр төрөөбүтэ. Дмитрий олох кыра сааһыттан аҕата Дмитрий Федосеевич такыйыытынан сүүрүүнэн, атах оонньуутунан дьарыктаныытын саҕалаабыта. Аҕата төрөөбүт-үөскээбит Амматын баһылыгынан талыллан, Дмитрий 8-с кылаастан Амма 1-кы №-дээх орто оскуолатыгар үөрэммитэ уонна биллиилээх тренер П.С. Иванов салалтатынан атах оонньуутунан, кылгас дистанцияларга сүүрүүнэн дьарыктанан үчүгэй түмүктэри ситиспитэ. Кини 8-9-10 кылаастарга үөрэнэ сылдьан Амма улууһугар оҕолорго атах оонньуутугар, 100, 200, 400 м дистанцияларга сүүрүүгэ элбэхтик чемпионнаабыта. 1999 с. Тааттаҕа ыытыллыбыт XVI Олоҥхо оонньууларыгар атах оонньууларыгар оҕолорго I, II миэстэлэри ылаттаабыта.

Дмитрий Саха государственнай университетын физкультурнай институтугар үөрэнэр сылларыгар ааттаах-суоллаах тренер А.Т. Прокопьев салалтатынан салгыы дьарыктаммыта уонна кылгас дистанциялары сүүрүүгэ уһулуччу ситиһиилэрдэммитэ, үрдүк кылаастаах спортсмен быһыытынан аата-суола Саха сиригэр биллэр-көстөр буолбута. Ол курдук, 2009 с. Бүлүүгэ буолбут, 2013 с. Чурапчыга буолбут Манчаары Спартакиадаларыгар кылгас дистанцияларга сүүрүүгэ, СР норуоттарын спортивнай Оонньууларыгар 2000 с. Покровскайга, 2003 с. Хаандыгаҕа, 2006 с. Сунтаарга, 2010 с. Өлүөхүмэҕэ, 2014 с. Намҥа чемпион уонна иккис, үһүс бириистээх миэстэлэри ылаттаабыта, Саха Республикатыгар спорт бу көрүҥнэригэр элбэх төгүллээх чемпиона, призера буолбута.

Дмитрий 2004 с. 4х100, 4х400 м эстафетаҕа сүүрүүгэ республика рекордсмена буолбута, Уһук Илиҥҥи Федеральнай уокурукка 2003, 2004, 2008, 2009 сс. кылгас дистанцияҕа сүүрүүлэргэ призердаабыта, олимпийскай чемпионка М.Д. Пинигина бирииһигэр ыытыллар Бүтүн Россиятааҕы турнирга 2004-2012 сс. чемпионнаабыта уонна призердаабыта.

Дмитрий Дмитриевич чэпчэки атлетикаҕа Россия спордун маастарыгар кандидат, атах оонньууларыгар Саха Республикатын спордун маастара. Кини 400 м сүүрүүгэ олохтообут рекорда бэрт уһуннук турбутун кэннэ биир дойдулааҕа, эрчийбит уола Михаил Руфов алдьатан саҥа рекорду олохтообута.

Дмитрий Дмитриевич 2008 с. атах оонньуутугар ыччаттарга Саха Республикатын старшай тренеринэн ситиһиилээхтик үлэлиир, кини иитиллээччилэриттэн республика чемпионнара уонна призердара, аҕыс спорт маастардара таҕыстылар.

Дмитрий Дмитриевич төрөөбүт-үөскээбит Үөһээ Бүлүүтүн улууһун бочуоттаах гражданина. Кэргэннээх, икки оҕолоох.