Кирилл Никонович Бүлүү оройуонун Баппаҕаайы нэһилиэгэр 1938 с. төрөөбүтэ. Кирилл Никонович үлэ ветерана, САССР уонна РСФСР спордун ветерана, ССРС спордун маастарыгар кандидат. Кини уһун дистанцияларга сүүрүүгэ республика 29 төгүллээх чемпиона. Орто, стайерскай дистанцияларга, аччыгый марафоҥҥа (35 км) дэгиттэр үчүгэйдик сүүрэрэ. Уһук Илин зонатыгар 10 км бастакы, иккис миэстэлэргэ тиксибитэ, Россия араас турнирдарын кыайыылааҕа, призера буолбута.

1965 с. Кирилл Никифоров аата республикаҕа киэҥник биллибитэ, чэпчэки атлетикаҕа республика хамаандатын чилиэнинэн 13 сыл сылдьыбыта, Саха АССР спордун маастара.

Кирилл Никонович 5000 м. уонна 10000 м. республика рекордун үс төгүл олохтообута.

Россия тыа сиринээҕи Спартакиадатыгар үһүс миэстэлэммитэ. Россия, Союз чемпионаттарын кыттыылааҕа.

Кирилл Никонович 1982 с. саха норуотун уус-уран айымньытынан дьарыктанар. “Мохсоҕоллой Боотур”, “Хабытта Бэргэн” диэн икки улахан олоҥхолоох уонна 50 тойуктаах. Олоҥхотунан Англияҕа, Японияҕа, Казахстаҥҥа, Кыргызстаҥҥа уонна АХШ-ка сылдьыбыта.

Кирилл Никонович 2005 с. Москваҕа П.И. Чайковскай аатынан консерватория концертнай залыгар олоҥхолоон, тойук туойан Бүтүн Россия лауреатын аатын ылбыта,  “Душа России” диэн бэлиэнэн наҕараадаламмыта.

Үөһээ Бүлүү сэлиэнньэтигэр бэйэтин үбүнэн “Арчы дьиэтин” бэйэтэ туттар.