Олег 1966 с. Үөһээ Бүлүүгэ төрөөбүтэ, манна улааппыта. И. Барахов аатынан орто оскуоланы бүтэрбитэ, итиэннэ тута Московскай уобалас Егорьевскай куораттааҕы летнай-техническай училищетыгар үөрэнэ киирбитэ. Кини билигин ити училище бастакы курсугар ситиһиилээхтик үөрэнэр, авиатор буолар баҕалаах. Олег училищеҕа киирээт даҕаны, эдэр киһи сиэринэн спордунан күүскэ дьарыктаммыта. Табыллыан быатыгар Егорьевскай училищеҕа спордунан, чуолаан чэпчэки атлетиканан дьарыктанарга бэртээхэй усулуобуйа баар буолан биэрбитэ. Ол курдук күн аайы эрчиллэргэ манеж, үрдүк квалификациялаах тренер, спордунан үлүһүйэн дьарыктанарга көҕүлүүр табаарыстар манна бааллара.

         Олег маҥнай 1981 с. “Коммунизм сардаҥата” хаһыат бирииһин иһин эстафетаны кыайбыта, онтон санаата көтөҕүллэн кылгас дистанцияларга сүүрүүгэ оройуонугар, Бүлүү зонатыгар оҕолорго республикаҕа бастаталыыр, призердуур. Кини оройуоннааҕы күрэхтэһиигэ 100 м дистанцияны 10,6 сөк. кэлэн оройуон спордун историятыгар урут ситиһиллибэтэх кирбиини ылбыта. Олег Пелогеин оскуолатааҕы тренердэрэ З.В. Тарабукина уонна Г.А. Николаев итинтэн улаханнык соһуйбаттар.

         Олег бэрт кыратыттан чэпчэки атлетиканан ордук үлүһүйбүтэ, училищеҕа үөрэнэ сылдьан ССРС спордун маастара буолбута.

         Ийэтэ Пелогеина Антонина Леонидовна, ииппит аҕата Алексеев Юрий Никифорович Үөһээ Бүлүүгэ олороллор, үлэлииллэр.