Миша 1996 с. алтынньы ыйга төрөөбүтэ, Аркадий, Надежда Руфовтар иккис оҕолоро. Бу кэмҥэ ХИФУ студена, 2-с кууруска үөрэнэр. Миша 6-с кылааска үөрэнэ сылдьан Дүллүкүгэ ыытыллыбыт САССР атах оонньуутугар маастара Михаил Ан бирииһигэр кыттыбыта. Бу күрэхтэһиигэ Бүлүү улууһуттан биллиилээх тренер Иван Иванович Чиркоев кэлэ сылдьара уонна Мишаны дьонун кытта кэпсэтэн Чурапчыга илдьэ барбыта. “Дети Азии-12 кытыннарыам, ойор кыахтаах эбит” — диэн быһаччы эппитэ. Ити 2010 с. этэ. Тренер сыыстарбатаҕа 2012 с. норуоттар икки ардыларынааҕы “Дети Азии” күрэхтэһиигэ Миша I м ылбыта. Ол курдук кылыыга 43,17 см, ыстаҥаҕа 41,70 см, куобахха 33,27 см ойон, үс көрүҥ түмүгүнэн 118,17 см ойбута уонна I м ылбыта, маны таһынан кылыыга, ыстаҥаҕа бастаан үс кыһыл көмүс мэтээл хаһаайына буолбута. Ити дьыл СР XV Спартакиадатыгар оҕолорго эмиэ бастаабыта. 2012 с. түмүгүнэн Чурапчы улууһун, Саха Республикатын оҕолорго бастыҥ спортсменнарын иһигэр киирбитэ. СР Президенэ Е.А. Борисовтан Махтал суругунан наҕаарадаламмыта.

         Миша 2013 с. Манчаары Спартакиадатыгар атах оонньуутугар үс көрүҥ түмүгүнэн II  уонна Үөһээ Бүлүү улууһун рекордун лаппа куоһарбыта. Бу куоталаһыыга Миша кылыыга 44 м 08 см ойбута. Бу үрдүк ситиһии. Бу куоталаһыыга Миша 100 м сүүрүүгэ II м ылбыта уонна 10,83 сек. кэлбитэ. Бу сүүрүүгэ көрдөрүүтэ эмиэ биһиги улууспут биир бастыҥ көрдөрүүтэ. 2013 с. оҕолор Саха сиринээҕи XVI Спартакиадаларыгар атах оонньуутугар I м ылбыта, 100, 200 м дистанцияҕа II м ылбыта. Маны таһынан 100х200х300х400 м эстафетаҕа төрдүс этапка сүүрэн хамаандата I м ылбыта. Бу дьыл үөрэнэр Чурапчытын улууһуттан атах оонньуутун Федерациятын Кубогар кыттан I м ылбыттара. Ити сыл түмүгүнэн Чурапчы оройуонун оҕолорун 10 бастыҥ спортсменнарын иһигэр киирэн Чурапчы улууһун баһылыгын С.И. Яковлев Махтал суругун туппута. 2014 с. үүнэр, уол атах оонньуутугар Дьокуускай куорат чемпиона буолар. Онтон СР чемпионатыгар 100 м (11,33 сек.) III м ылар, 200 м 22,47 сек. сүүрэн II м ылар уонна атаҕар эчэйии ылан 2015 с. улаханнык күрэхтэспэт, травматын оһорунар, эмтэнэр. Ол эрэн атаҕа ойууга, атах оонньуутугар мэһэйдиир, онтон сүүрүүнэн эрэ дьарыктанар. Ити сыл 20 сааһыгар дылы саастаахтарга Уһук Илин Федеральнай уокурук куоталаһыытыгар 400 м (52,66) көрдөрүүлээх бастыыр, эстафетаҕа III м ылаллар. Михаил бүтэһик, 400 м этапка сүүрэр. Миша Саха сирин сүүмэрдэммит хамаандатын кытта Россия эдэрдэрин куоталаһыытыгар эстафетаҕа I м ылаллар, манна эмиэ Михаил 100х200х300х400 м эстафетаҕа бүтэһик 400 м сүүрэр, Саха сирин хамаандатын I м таһаарар. Бу куоталаһыы түмүгүнэн Михаил Руфов Россия чемпионатыгар Москва куоракка кыттар быраабы ылар, ол аата Россия финальнай куоталаһыытыгар. Ити этиллэр III этапка бастаабытын иһин Россия спортка министрэ В. Мутко грамотатынан наҕараадаланар.

         2016 с. олимпийскай чемпионка Мария Пинигина чиэһигэр ыытыллыбыт Бүтүн Россиятааҕы турнирга 4х400 м дистанцияҕа I м саха быһыйдара ылаллар, Миша эмиэ бүтэһик этапка сүүрэр, бириэмэлэрэ да туйгун, 3 м 66,66 сөк. Бу куоталаһыыга кини 400 м 49,92 сек. кэлэн Саха Республикатын чемпиона уонна М. Пинигина турнирын чемпиона буолар. Миша улаханнык сүүрүөн иннинэ атах оонньуутугар элбэх куоталаһыылары кыайбыта. Ол курдук, Валерий Кочнев бирииһин, Бөҕө Тоҥус, Михаил Ан бириистэрин кыайбыта, кини атах оонньуутугар Иван Чиркоев, Дмитрий Наумов эрчийбиттэрэ, билигин сүүрүүгэ Мария Пинигина дьарыктыыр. Миша100 м, 400 м дистанцияларга сөбүлээн сүүрэр.

         2016 с. улахан дьон Россиятааҕы куоталаһыыларыгар Москва куоракка 400 м сүүрэн РФ спордун маастарыгар кандидат нуорматын толорор уонна Дмитрий Наумов олохтообут рекордун тупсарар.

         Уһун кыһыннаах Саха сиригэр билигин эрчиллэр усулуобуйа баар, ол эрэн кыһын кэлбэт дойдутугар Киргизияҕа тренер М. Пинигина салалтатынан сылга хас да төгүл баран эрчиллэр, көрдөрүүтэ тупса турар, сүүрэрэ стабильнай буолла. Эдэригэр 400 м сүүрбүт олимпийскай чемпионка М. Пинигина Михаилтан улахан сүүрүк тахсыан билэн эрчийэн эрдэҕэ. Аны сайын юбилейдаах Манчаары Спартакиадатыгар Миша 100 м сүүрүөхтээх уонна атаҕа үчүгэй буоллаҕына ойуохтаах.

         Миша бастыҥ көрдөрүүлэрэ манныктар: 100 м — 10,83; 200 м — 22,47; 400 м — 49,69; кылыы — 44,08 м; ыстаҥа — 41,70 м; куобах — 38,00 м. Бу көрдөрүүлэртэн 400 м сүүрүүгэ (49,69) Саха сирин рекорда буолар, онтон атына Үөһээ Бүлүү улууһун рекортара.