Коля Руфов 1999 с. от ыйын 24 к. Дүллүкү нэһилиэгэр Аркадий Николаевич, Надежда Михайловна дьиэ кэргэттэригэр 4-с оҕонон күн сирин көрбүтэ уонна эһэтин аатын иҥэрэн Николай диэн ааттаабыттар, Мишаны уол ийэтинэн эһэтин аатынан Михаил диэн ааттаабыттар. Онон уолаттар эһэлэрин аатын сүкпүттэр. Коля Руфов эмиэ убайын Миша курдук Михаил Ан бирииһиттэн спортсмен биһыытынан биллибитэ уонна эмиэ бу күрэхтэһии хас да төгүллээх чемпиона. Улуустааҕы спорт управлениетын начальнига Е.А. Николаев кэпсэтэн Коляны Мэҥэ-Хаҥаласка аатырбыт кылыыһыт, тренер Борис Ильин оскуолатыгар 9-с кылааска үөрэнэ сырыттаҕына ыыппыта. Уол билигин да Борис Ильин сорудаҕынан төһө да Дүллүкүгэ үөрэннэр эрчиллэ сылдьар уонна көрдөрүүтэ тупсар. Атах оонньуурун таһынан өссө сүүрүүгэ эрчиллэр. Коля сүүрүүгэ 2015, 2016 сс. оскуола оҕолоругар Саха сирин чемпиона буолбута. Кини 60 м — 6,93 сөк., 100 м — 10,83 сөк., 200 м — 22,85 сөк. бу бириэмэлэринэн кэлэн оҕолорго чемпион буолбута. Хотугу Федеральнай уокурук 2016 с. Саха сирин хамаандата 4х200 м эстафетаҕа I м ылбыттара. Саха уолаттара Мэҥэ-Хаҥаластан Виктор Аргунов, Петя Филиппов, Хаҥаластан Павлов уонна Үөһээ-Бүлүүттэн Коля Руфов састааптаах хамаанда уокурук чемпионнара буолбуттара. Быйыл кыһын республикаҕа оҕолор чемпионаттарыгар 37 м 48 см куобахтаан республика чемпиона буолла уонна СР спордун маастарын нуорматын толордо. Бу ойуу Үөһээ Бүлүү оройуонун улахан дьоҥҥо рекорда. Николай быйыл Дүллүкү оскуолатын 11-с кылааһыгар үөрэнэр, уол улаатан 180 см чугаһаан эрэр, ыйааһына да 70 кг буолбут, онон ойор, сүүрэр үчүгэй турукка киирэр буолбут, 18-н туола илик, онон барыта иннигэр. Коля өссө да күүскэ дьарыктанан убайа Михаил курдук улахан дьон ортотугар тахсан куоталаһыан наада. Быйыл юбилейдаах Манчаары Спартакиадатыгар улууһун чиэһин оҕолорго 100 м, атах оонньуутугар көмүскүүрдүү бэлэмнэнэр. Онон кини иннигэр орто оскуоланы бүтэрэр, Манчаары Спартакиадатыгар ситиһиилээхтик кыттар улахан соруктар тураллар.