Юрий Герасимович 1941 с. тохсунньу 22 к. Ньурбаҕа төрөөбүтэ.

Юрий ССРС спордун маастарыгар кандидат, чэпчэки атлетикаҕа РФ уонна СР спордун маастара, СР педагогическай үлэҕэ, РСФСР уонна СР спордун ветерана, СР үөрэҕириитин туйгуна, СР физическэй культуратын уонна спордун туйгуна.

Хамсаныы биир сүрүн көрүҥэр, сүүрүүгэ былыр-былыргаттан улахан суолта бэриллибитин туоһулуур өйдөбүнньүгүнэн Эллада үрдүк таас хайатыгар суруллубут былыргы сурук буолар: “Күүстээх буолуоххун баҕардаххына — сүүр, кэрэ дьүһүннэниэххин баҕардаххына — сүүр, өйдөөх буолуоххун баҕарар буоллаххына — сүүр” — диэн. Спорт киһиттэн элбэх сыратын-сылбатын ылар, ол иһин олоҕуҥ быстыспат аргыһа буолар. Кини киһини бэрээдэккэ, сэмэй буоларга уонна кэми таба аттаран туһанарга үөрэтэр.

Юрий Герасимович аҕата Герасим Петрович уонна ийэтэ Анастасия Ефимовна Сергеевтар элбэх оҕолоохтор. Күн сирин күндүтүн көрдөрбүт ийэтэ Анастасия уолун Юрий диэн сүрэхтээбиттэр. Юрий дьонугар уон биирис оҕо. Юраны Ньурба 1-кы №-дээх оскуолатыгар үөрэнэ сырыттаҕына физкультура учууталлара Афанасий Михайлович Саввинов, Николай Семенович Васильев, Григорий Дмитриевич Чумпуров сүүрүүгэ дьарыктыыллар.

Юрий 1961 сылтан 1964 сылга дылы Советскай Союз Бойобуой Кыһыл Знамя орденнаах Чуумпу акыйааннааҕы Байыаннай Флотун подводнай лодкаларыгар туйгуннук сулууспалаабыта.

Юрий сулууспатын кэнниттэн Ньурба пордугар моториһынан үлэлиир, 1968-1972 сс. Хабаровскай физкультурнай институтун үөрэнэн бүтэрэр уонна 1972-1979 сс. Үөһээ Бүлүүтээҕи И. Барахов аатынан орто оскуолаҕа физкультура учууталынан үлэлиир. Кини эрчийбит үөрэнээччилэрэ улуус, Бүлүү зонатын, республика чемпионнарынан, призердарынан буолбуттара. Кинилэртэн ордук ситиһиилээхтэринэн Гоша Яковлев, Оля Кужнурова, Сережа Цыбулькин, Витя Жаров, Таня Севастьянова, Таня Данилова, Аня Ислахова, Вася Попов, спортивнай хаамыыга Витя Новиков, ГТО многоборьетыгар Боря Лопухин буолбуттара.

Юрий Сергеев Манчаары Баһылай Спартакиадатын чэпчэки атлетикаҕа алта төгүллээх кыайыылааҕа, Москва куоракка ССРС ветераннарын чэпчэки атлетикаҕа  бастакы күрэхтэһиилэригэр, Россия ветераннарга чемпионатыгар сэттэ иһигэр киирбитэ, 800 м иккис миэстэни 1992 с. Краснодар куоракка ылбыта, 2003 с. Королево куоракка ыытыллыбыт норуоттар икки ардыларынааҕы сүүрүүгэ уон иһигэр киирбитэ, Саха АССР 10000 м сүүрүүгэ рекордсмена.

Ю.Г. Сергеев улаханнык сааһырбакка сылдьан, ыарахан ыарыыттан 2016 с. олохтон туораабыта. Билиҥҥи уонна кэлэр да көлүөнэ ыччат талааннаах спортсмен, ыччат лидерэ, үтүө үлэһит, көрсүө-сэмэй киһи Юрий Сергеев олоҕун холобур оҥостуохтара, кини аатынан киэн туттуохтара, амарахтык ахтар ыччаттар тахсыахтара диэн эрэниэҕи баҕарыллар.