Алена Анатольевна 1990 сыллаахха сэтинньи  12 күнүгэр Үөһээ Бүлүүгэ төрөөбүтэ. Билигин куорат  17-c  оскуолатын үөрэнээччитэ, 5-c   нүөмэрдээх спортивнай оскуолаҕа эрчиллэр, республика оҕолорго сүрүн тренерэ Д.В. Колесов иитиллээччитэ (бастакы тренерэ Г.А. Николаев). Алена Узнаева бэс ыйын 18 күнүгэр Сочи куоракка, 14-15 саастаах кыргыттарга Россияҕа бастыыр иһин күрэхтэһиигэ 1500 м сиргэ сырсыыга Саха сирин спордун историятыгар аан маҥнай биэтэккэ бастакынан кэлэн Россия кыайыылааҕын үрдүк аатын ылбыта. Бу сырсыыга Алена 1500 м дистанцияны 4.37,2  сек. кэлэн тус бэйэтин рекордун 5  сөкүүндэнэн, Наташа Леонтьеваҕа “Азия оҕолоро”  оонньууларга олохтообут республика кыргыттарыгар рекордун  2,8 сөкүүндэнэн, марафоҥҥа ССРС спордун маастара Татьяна Бонько 1991 сыллаахха Владивостокка республика  дьахталларга олохтообут рекордун 0,4 сөкүүндэнэн тупсарбыта.

Үөһээ Бүлүү биллэрин курдук олус уһун сиргэ сырсыыга аан дойдуга аатырбыт Россия спордун норуоттар икки ардыларынааҕы кылаастаах маастардара Сардаана Трофимова, Михаил Еремисов, Лариса Семенова, Николай Бускаров дойдулара буолар. Бу улуус тренердэрэ уһуну-киэҥи санааннар кэскиллээх оҕолорун Борис Васильевы (тренер Михаил Еремисов), Алена Узнаеваны, Диана Тартакынованы, Сардаана Трофимованы (тренер Геннадий Николаев) киин куоракка республика оҕолорго сүрүн тренерэ Д.В. Колесовка ыыппыттарын түмүгэр Саха сиригэр бу дьоһуннаах ситиһиилэр баар буоллулар. Алена да ситиһиилэрэ добуоччу. Борис Уһук Илин кыайыылааҕа, Россияҕа үөрэнээччилэргэ бэһис миэстэлээх, республика оҕолорго рекордсмена.

Алена сүрүн ситиһиилэрэ:

2003  сылга Хабаровскайга “Шиповка юных” күрэхтэһиигэ  500 м 3-c миэстэ.

2004 сылга Хабаровскайга Уһук Илин күрэхтэһиитигэр 800 м 2.20,7 сөк. 1500 м 4.48,9 сөк. кэлэн икки төгүл үһүс буолбута, олунньуга Пензаҕа бэйэтин саастыылаахтарыгар Россия Үөрэххэ министерствотын күрэхтэһиитигэр 1500 м 4.44,8 сөк. кэлэн үһүс, 3000 м 10.10,0 сөк.  кэлэн төрдүс, муус устарга Ставрополь куоракка Россияҕа бастыыр иһин күрэхтэһиигэ 2  км сири 6.41,7 сөк. кэлэн иккис буолуталаабыта, 6 х1000 м   эстафетаҕа тиһэх быһаарыылаах этапка сүүрэн Саха сирин хамаандатын историяҕа аан маҥнай  Россияҕа үһүс миэстэҕэ таһаарбыта, ыам ыйыгар Владивостокка Уһук Илин  “Приморская весна” диэн оҕолор спортивнай оонньууларыгар, бэйэтин саастыылаахтарыгар 800 м 2.21,4 сөк. уонна 1500 м 4.50,4 сөк. кэлэн бастакы миэстэлэри ылар, от ыйыгар “Азия оҕолоро” оонньууларга 2-3 сыл аҕа саастаах кыргыттарга  1500 м 14-c миэстэҕэ тахсар, 2005 сыллаахха Пенза куоракка бэйэтин саастыылаахтарыгар Госкомспорт линиятынан Россияҕа бастыыр иһин күрэхтэһиигэ 1500 м 4.45,2 сөк., 3000 м 10.29,1 сөк. кэлэн икки төгүл иккис буолар. Ыам ыйыгар Россия үөрэнээччилэрин II Спартакиадатын Уһук Илин зонатын күрэхтэһиитигэр икки сыл аҕа саастаах кыргыттарга 1500 м тус рекордун олохтоон туран  4.42,0 сөк. кэлэн иккис,  800 м 2.17,0 3 сөк. кэлэн үһүс миэстэлэри ылар.

Көстөрүн курдук, Алена бүгүҥҥү үрдүк ситиһиитэ соһуччу кыайыы буолбатах, бу кыайыыга тренеринээн Дмитрий Васильевич Колесовтыын үс сыл устата чопчу былааннаахтык үлэлээн, эрчиллэн бииртэн биир үрдэли дабайан кэллилэр. Кинилэргэ бу ситиһиигэ олук уурсубут, өйөөбүт, өйдөөбүт дьоннорунан республика чэпчэки атлетикаҕа Федерациятын президенэ А.А. Пахомов, Госкомспорт, Үөрэх министерствота, Сахаполиграфиздат генеральнай директора А.М. Скобелева, Үөһээ Бүлүү улууһун дьаһалтата буолаллар, онон кинилэргэ Алена тренеринээн дириҥ махталларын биллэрэллэр.

Алена куоракка үөрэнэ барыар диэри Үөһээ Бүлүүтээҕи тоҕус кылаастаах оскуолаҕа үөрэммитэ, оҕо спортивнай оскуолатыгар дьарыктаммыта. Билигин Дьокуускай куоракка олорор, кэргэннээх, икки оҕолоох. Кэргэнэ Татаринов Михаил Игнатьеивч ГАИ инспектора. Алена ДьГТХА-ны бүтэрэн экономист идэлэммитэ. Чэпчэки атлетикаҕа Россия спордун маастара.