Юлия 1982 с. балаҕан ыйын 1 к. Үөһээ Бүлүү оройуонугар төрөөбүтэ. 1996 с. бастакы “Азия оҕолоро” оонньуу ыытыллар сылыгар кыһын республика чемпионатыгар Үөһээ Бүлүүттэн гимназия 11-с кылааһын үөрэнээччитэ Юлия Шелекасова биир холонуунан устаны ыстаныыга республика чемпионкатын аатын ылбыта.

         Юлия итиннэ 4 м 78 см көрдөрбүтэ. Итиччэ ырааҕы биһиги оройуонтан ким даҕаны ыстана илигэ, Юлия бу көрдөрүүтэ улахан дьоҥҥо эмиэ рекорд буолар. Ити ыстанар кэмигэр Юлия 14 саастааҕа, балаҕан ыйыгар 15 сааһын туолуохтааҕа.

         1998 с. Үөһээ Бүлүү гимназиятын ситиһиилээхтик бүтэрэр. Юлия Үөһээ Бүлүүтээҕи гимназияҕа үөрэммит сылларын маннык ахтар: “Бары да үөрэх туһа диэн кэлбит буолан, сөҕүмэр дьаныардаахтык, бэйэ-бэйэҕэ көҕүйсэн, чахчы да үөрэх, билии эйгэтигэр ылларан үөрэммиппит. Онон араас улуустан кэлбит оҕолор бары биир ыал оҕотун курдук эйэлээхтик сылдьыбыппыт. Араас тэрээһиннэргэ көхтөөхтүк кыттан дуоһуйарбыт. Хас бэнидиэнньик аайы сахалыы таҥнан-симэнэн үөрэнэр сонун көстүү буолара. Оҕо ис сүрэҕиттэн баҕаран үөрэнэрин, эбии дьарыктанарын учууталларбыт сатаан көҕүлүүллэрэ. Гимназияҕа үөрэммит сылларбыт биһиэхэ сырдык, дьоллоох түгэннэри санатар, махталбыт муҥура суох улахан”.

Юлия билигин үрдүк үөрэхтээх психолог, Дьокуускай куоракка олорор, бэйэтэ омугунан нуучча, саха кэргэннээх, оҕолоох. 2011 с. “Олоҥхо” театрын кадрга отделын начальнигынан үлэлиир.