1939 с. алтынньы ыйын 25 к. Үөһээ Бүлүү нэһилиэгэр төрөөбүтэ.

         1978 с. хайыһарга Саха АССР спордун маастара.

         1978 с. хайыһарга ССРС спордун маастарыгар кандидат.

         1972 с. оҕунан ытыыга II спортивнай разрядтаах.

1959 с. спортивнай гимнастикаҕа II разрядтаах.

1963 с. Үөһээ Бүлүү оройуонун дьахталларыттан бастакынан анал физкультурнай үрдүк үөрэх дипломун ылбыта.

Кини оҕунан ытыыга 1971 с. Манчаары III Спартакиадатыгар 50 м дистанцияҕа чемпионнаабыта, 30 м иккис миэстэлэммитэ.

1972 с. оҕунан ытыыга Саха АССР сүүмэрдэммит хамаандатыгар ылыллыбыта.

Оҕунан ытыыга ССРС тыа сиринээҕи спортсменнарын чемпионатын кыттыылааҕа — 1972 с. (Орджоникидзе)

1973 с. (Улан-Удэ к.)

Ульяна Тимофеевна Барахова өр сылларга Үөһээ Бүлүүтээҕи аҕыс кылаастаах оскуолаҕа физкультура учууталынан үлэлээбитэ, оройуоннааҕы үөрэх салаатыгар методистаабыта, оҕо дьиэтигэр үлэлээбитэ, билигин пенсияҕа олорор. Ити курдук Ульяна Тимофеевна таптаан спордунан дьарыктаммыт буолан, эдэр көлүөнэ эт-хаан өттүнэн сайдыытыгар, доруобай буола улаатарыгар физрук-учуутал эрэ быһыытынан буолбакка, доруобай, чөл олох иһин бастыҥ пропагандист, физкультурнай хамсааһын активиһа буолар. Ыһыах, чэпчэки атлетика, хайыһар, остуол тенниһин о.д.а. спорт көрүҥнэригэр элбэх түмсүүлээх маассабай күрэхтэһиилэргэ кини бастакы тэрийсээччи, үтүө сүбэһит, ирдэбиллээх наставник буолар. Ульяна Тимофеевна чэпчэки атлетика, хайыһар спордун федерациятын председателинэн үлэлиирин саҕана биһиги хайыһардьыттарбыт республикаҕа улахан ситиһиилэммиттэр. Хайыһар спорда физкультурнай хамсааһын маассабай көрүҥэр кубулуйан испитэ.

1978 с. оройуон 10 бастыҥ спортсмена.

1980 с. тэриллибит оройуон бастыҥ спортсменнарын Бочуотун дуоскатыгар киллэриллибитэ. Өр сыллаах спортивнай үлэтэ дьоһун сыанабылы ылыан ылбыта. Ол курдук, Ленин үбүлүөйдээх мэтээлинэн, Саха АССР Үрдүкү Сэбиэтин Бочуотунай грамотатынан, “Социалистическай куоталаһыы кыайыылааҕа” бэлиэнэн, “Үлэ ветерана” мэтээлинэн, ЫБСЛКС КК “Оҕо спордун активнай тэрийээччитэ” бэлиэнэн наҕараадаламмыта. Ульяна Тимофеевна спортивнай албан аат аанын аспыт, бастыгын олугун уурсубут киһинэн 1958 с. ресспортсовет председателэ Николай Николаевич Тарскай буолбута. Оччотооҕу райкомол секретара Юрий Николаевич Прокопьевтан истэн Николай Николаевич физкультура үрдүк үөрэхтээх учуутала буоллун диэн Омскайдааҕы физкультурнай институкка Саха сирин аатыттан туруорсан ыыппыт Н.Н. Тарскай сырдык эрэлин Ульяна Тимофеевна чиэстээхтик толордо. Кини Үөһээ Бүлүү улууһун уонна Үөдүгэй нэһилиэгин бочуоттаах гражданина, РСФСР норуотун үөрэҕириитин туйгуна. Элбэх сиэн тапталлаах эбэтин, кыһамньылаах ийэтин У.Т. Барахова аҥардас спортивнай олоҕун, оҕо туһугар араас түбүктээх общественнай үлэтин билэрим сүрүнэ итинник.