1931 с. муус устар 2 к. Үөһээ Бүлүү оройуонугар Дүллүкү нэһилиэгэр төрөөбүтэ.

         Кини Үөһээ Бүлүү аатын спорт араас көрүҥнэригэр саамай элбэхтик көмүскээбит дьоннортон биирдэстэрэ. Иван Иванов сүүрүүгэ уонна хайыһарга сүрүннээн кыттыбыта. Дьыл ичигэс кэмигэр саас, сайын сүүрэрэ, кыһынын хайыһардыыра.

         Кини үлэтин биографията 1951 с. балаҕан ыйыттан саҕаланар. Иван ити кэмҥэ Бүлүү оройуонугар Ис дьыала отделыгар куонньук эбит.

         1961 с. иккис дойдутун Үөһээ Бүлүүнү булан Үөһээ Бүлүүтээҕи промкомбинакка болуотунньук, пилорамщик буолбут. Кэргэнэ Зинаида Константиновна Иванова — учуутал уонна поэтесса. Кинилэр Лида, Костя, Дьулустаан диэн оҕоломмуттара.

         Спортка бастакы ситиһиилэри Иван Ивановка Горнай оройуон тосхойбута. Ол курдук, 1959 с. бэс ыйын 10 к. оройуонугар 5000 м сүүрүүгэ уонна сахалыы ыстаныыларга куобахха иккис буолбут.

         1960 с. ити ситиһиилэрин хаттаан чиҥэппитэ. Ол эрээри, Иван Иванов дойдутугар Үөһээ Бүлүүгэ кэлэн баран спортка үрдүк ситиһиилэммитэ.

         1967 с. балаҕан ыйыгар Советскай Союз геройа Федор Попов бирииһигэр республикатааҕы кросска Иван Иванов 3000 м дистанцияҕа 10 мүн. 35 сөк. көрдөрөн иккис буолбута.

         1971 с. эмиэ Дьокуускайга Баһылай Манчаары III спартакиадатыгар Иван Иванов 1500 м дистанцияҕа 4 мүн. 49,8 сөк. көрдөрөн үһүс бириистээх миэстэни ылбыта.

         1972 с. саас хаардаахха Үөһээ Бүлүү оройуонун хамаандата хайыһарга “Урожай” ДСО уобаластааҕы сэбиэтин күрэхтэһиитигэр хамаанданан чаҕылхайдык бастаабыта. Хамаанда састаабыгар: Ульяна Барахова, Иван Иванов, Антонина Шамаева, Петр Гольдеров, У. Шологонова уо.д.а. бааллара. Иван бэйэтин дистанциятыгар уонна эстафетаҕа үчүгэйдик сүүрбүтэ. Иван сүүрэрин, хайыһардыырын таһынан үчүгэйдик тустар эбит.

         1968 с. Буучугурас бирииһигэр тустууга бириискэ тиксибит.

         1973 с. многоборьеҕа оройуоҥҥа бастаабыт грамотата баар. Биир тылынан эттэххэ дэгиттэр спортсмен эбит. Кыһыннары-сайыннары кинини хайыһар суолугар, сүүрэр дорожкаҕа көрүөххэ сөбө. И.Н. Иванов Үөһээ Бүлүү чиэһин сүүрүүгэ уонна хайыһарга 1961 сылтан 1978 сылга диэри көмүскээбит үтүөлээх эбит. Аҥардас “Оройуона чемпиона” диэн 14 жетоннааҕа. Республикаҕа призера 6 устуука жетоннааҕа.

         Промкомбинаттан сельсовет депутата буолбута. “Урожай” ДСО Бочуоттаах чилиэнинэн ылыллыбыта. Бэйэтэ чөл олоҕу тутуһар, күннэтэ эрчиллэр, ыччаттарга үтүө холобур буолар киһи этэ.