1937 с. кулун тутар 18 к. Дүллүкүгэ төрөөбүтэ. Кини 2 саастааҕар аҕатын дойдутугар Намҥа көһөн кэлбиттэр. Онон улааппыт, үөрэммит сирэ — Нам.

         Намҥа 7-с кылааһы үөрэнэн бүтэрбитэ. Ол кэннэ Үөһээ Бүлүү орто оскуолатын бүтэрээт, Дьокуускайга педучилищеҕа үөрэххэ киирбитэ.

         Итинтэн ыла спордунан дьарыктанан барбыта. Кыһынын хайыһардыыр, сайынын атаҕынан сүүрэр. Оччолорго оройуоҥҥа Ли-Фу Сергей уонна Золотарев Ким диэн учууталлар аатыран хайыһардыы сылдьар кэмнэрэ этэ. Олордуун хайыһардаан, кэлин кинилэри тулуппат хайыһардьыт буолан тахсыбыт. Педучилищеҕа үөрэнэр кэмигэр хайыһардьыт уонна сүүрүк быһыытынан улаханнык сайдыбыта. Мэлдьи зональнай күрэхтэһиилэргэ кыттара. Ол курдук Барнаулунан, Хабаровскайынан, Новосибирскайынан, Благовещенскайынан, Иркутскайынан күрэхтэһиилэргэ барара. Дьокуускайга буолар күрэхтэһиилэргэ мэлдьи да кэриэтэ бастакы миэстэни ылара. Кини үөрэҕин бүтэртин кэннэ Өлөөҥҥө физкультура учууталынан анаан ыыппыттара. Онно баран биир ый эрэ буолан, улаханнык ыалдьан Дьокуускайыгар кэлэн 1962 с. балаҕан ыйын 26 к. быар атрофиятыттан ыалдьан өлбүтэ. Кини көмүс уҥуоҕун Дьокуускайга харайбыттара.

         Илларион Руфович өлүөн иннинэ “Кандидат в мастера спорта СССР по лыжам” диэн ааты ылбыт. Бииргэ төрөөбүт эдьиийэ Мария Руфовна Никифорова 1954 сылларга оройуонун спартакиадатыгар сүүрбүт эбит. Ол курдук Илларион аатын ааттаабыттар. Мария Руфовна бэйэтин оҕотун Илларион Кардашевскай таайын аатын сүгэр.

         Аймахтара Илларион Николаев Далыр орто оскуолатын физруга. Илларион Аталларов дойдутугар рабочайдыыр, Илларион Максимов байыаннай офицер, Илларион Лазарев хоту Анаабырга олорор, үлэлиир. Хомолтото диэн, ыал буолбакка, кэннигэр кинини санатар киһитэ суох бу орто дойдуттан барбыта буолар.